Nongstoiñ, Naiwieng 17
Ka kynhun ïalehkai jong ka Mawkawah SC bad ka Sawlad SC ki la ïasam mar shi point ha ka lympung ïalehkai Super Division (NDSA Premier League Football Tournament 2023-24 hadien ba ki la ïakhaid mar 2-2 kol ha ka sngi Thohdieng.
Ïa ki ar tylli ki kol jong ka Mawkawah la thep da u Micky Marngar ha ka minit kaba 32 bad u Josgilbert Wahlang (76), katba ïa ki ar tylli ki kol jong ka Sawlad la ïoh ban thep da u Banshembha Ïawren (26) bad u Wilson Ïawren (85)
Haba phai pat sha ka 1st Division, ka Lawse SC ka la khur ïa ka jingjop hadien ba ka la pynliem noh ïa ka Porshangbet da 1-0 kol.
Na ka liang ka tournament committee jong ka NDSA ka la pyntip ba ka jingïalehkai ha ka sngi Saitjaiñ ha ka 1st Division kan long hapdeng ka Nonglwai II pyrshah ïa ka Marskuiñ SC ha ka por 12 baje noh phai sngi, katba ha ka Super Division ka jingïalehkai kan long hapdeng ka Upper New Nongstoiñ pyrshah ïa ka Mawliehbah SC ha ka por 2 baje janmiet.
