Amlarem, Naiwieng 17
Ka Seinbhalang Shkentalang bad ka Jarain C&SC ki la ïasam mar shi point ha ka jingïalehkai jong ka Super Division Football League ba la pynïaid da ka Amlarem Sub Divisional Sports Association (ASSA) hadien ba ki la ïakhaid mar 1-1 kol ha ka sngi Thohdieng ha Mini Stadium Ladjaplem, Amlarem.
Ka jingïakhun ha kane ka sngi ka la long kaba ïakhaid naba baroh ar kynhun ki la ïakhun tyngeh naduh kaba sdang. Hadien shiteng kynta ka Jarain C&SC ka la ïoh ban pynkhih jar nyngkong ha ka minit kaba 38 lyngba u Judgemiwell Mukhim na ka bynta ban tam shi kol ha ka kylla step.
Hadien katto katne ba la bteng ïa ka jingïakhun jong ka kylla miet ka Seinbhalang Shkentalang ka la lah ban pynphai kylla ha ka minit kaba 78 lyngba u Ruben Dkhar na ka bynta ban ïakhaid mar shi kol haduh kaba kut ka jingïalehkai.
Ka jingïalehkai ha ka sngi Saitjaiñ kan long hapdeng ka YSWC Thangbuli pyrshah ïa ka Amlarem Social Club ha ka por 1 baje, katba ka Umladkhur SC ïa ka YC Pdengkarong ha ka por 2:30 nohphai sngi.
