Ki nongrep ha kine ki ar sngi ki la mad jingeh na ka jingther jong u slap khlem dei aïom. Kane ka por ka dei ka aïom jong ka jingot kba – don kiba la lah ban pyndep bad don kiba dang sah. Ka jingwan noh jong u slap ha kane ka por ka buh jingeh shikatdei ïa ki nongrep namar ki lah ban duh bun bah u kba mynta ka kynti. Ki la ïa trei shitom la bun bnai naduh ka aïom bet, bad ynda la dei ka por ban ot, u slap u la pynthut bad kjit ïa ka umsyep ba ki nongrep ki la theh baroh shi katta. Ka long shisha kaba i pangnud ban peit ïa ka jingshah lynshop ki nongrep na ka por sha ka por ha ki bor jong ka mariang. Ha ka jingleit ba dang shen sha them Ri-Bhoi, la ïohi ba ki dang bun bah kiba khlem pat ot kba bad ka lah ban shimpor da ki taïew ban lum ban lang ïa u kba. Hynrei kane ka jingwan lynshop jong u slap ka lah ban pynsah sa tang u jyntang kba ha lyngkha bad baroh u soh un hap lut sha madan.
Na ka bynta ki nongrep, ki bor jong ka mariang ki long thik kum ka waitlam arliang syrti – jingkyrkhu bad jingtim. Ha ka por ba donkam ïa u slap bad lada u wan, ki nongrep ki ïoh jingkyrkhu. Hynrei ynda la dei ka por ban kheit lane ot ïa u soh, da ka jinglynshop jong u slap ka long noh kum ka jingtim. Tangba ngim lah ban leh eiei namar ngi dang hap ban ïa im lang bad ka mariang – ngi donkam ïa ka mariang bad ka mariang ka donkam ïa ngi. Ha kum kine ki khep, ka sorkar ka dei ban wan shakhmat ban siew ïa ka bai lutksan jong ki nongrep. Ka sorkar ka dei ban phah jurip ha ki Block Development Officer (BDO) ïa ka bai lutksan na ka jingshah lynshop u kba bad ka dei ban siew ha ka dor kaba biang khnang ba kan long kum ka jingkyrshan ïa ki nongrep kiba la duh noh ban kheit ïa u soh jong ka jingtrei shitom.
Kiba kum kine ki jingwan lynshop ki ktah jur ïa ki nongrep ba ki pynduh mynsiem ruh ïa ki. Namarkata, ki ju don ki nongrep kiba iehnoh ïa ka rep ka riang bad ban wad noh da kiwei pat ki kam bylla namar kim sngewlah ban kyrda lada wan ka ‘nem sniew bad ka jingshah pynjot ha ki bor jong ka mariang. Sha ri thor, ki don bun bah ki nongrep kiba ju dkhat noh ïa la ka jong ka jingim namar ka jingbym manbha ka rep ka riang. Ka jingdkhat ïa la ka jingim ka dei namar ba ki la shim da ka ram na ki jaka kynshew pisa ne ki ‘riewshimet, hynrei namar ka jingbym seisoh, ki sngewthuh ba kin ym lah shuh ban siew ïa kata ka ram bad namarkata ki jied noh da ka lynti ban pynïap ïalade. Ka long shisha kaba sangsot namar lada ki nongrep kim khlaiñ, ka Ri kan duk na ka daw ba yn hap ban shu thied ïa ki marbam na shabar. Ka Ri kan ïakynduh jingeh lada synjor ka rep ka riang namar baroh ki donkam ïa ka bam ka sa lada dei kiba ‘riewspah ne duk. Mynta, lada tlot bad synjor ka rep ka riang, ka Ri kan hap ban thied marbam mardih na shabar bad tang hangta, ki duk ki suk ki la ïap lypa namar ka dor ka mur kan long kaba shyrkhei. Namarkata, ngin hap ban kyrshan ïa la ki jong ki nongrep da kaba thied ïa ki mar ki mata na ki khnang ban im ka Ri bad ki nongshong shnong baroh.
Ka sorkar ka dei ban ai jingkyrshan kaba tyngeh ïa ki nongrep khnang ba kin ym kynran dien na ka rep ka riang. Ngi dang donkam ban pynmih shibun u khaw, soh, bad ki jhur namar kumba ka long mynta, ïa kaba bun ka marbam ngi hap ban shaniah na shabar. Katno kan long kaba sngewtynnad lada ngi lah ban pyndap pynbiang hi dalade ïalade lane ban ïeng ha la ki jong ki kjat ha ka jingpynmih marbam. Hynrei kata kan ym urlong lano-lano lada duna ki nongrep kiba dei ki budlum jong ka ïoh ka kot. Lada bun ki nongrep bad pahuh ki marbam, ngi lah ban kynshew ïa ka pisa kham bun namar ngim donkam shuh ban ïa thied ïa pet na shabar shnong lane jylla lane Ri. Tangba lada kim ïoh ïa ka jingkyrshan ha ka rukom kaba dei, ngim dei ban khmih lynti ba ki nongrep kin nang roi namar wat kiba don lypa ruh kin iehnoh bad wad da kiwei pat ki kam bylla.
Kum ki nongshong shnong ngin ïa ai ïa ka kti kamon ka kti kadiang ïa ki nongrep ki jong ngi khnang ba kin nang lah ban ai ïa kaba bha tam ha ka rep ka riang bad kaba bha tam ruh kan phai kylla sha ki. Ha kum kine ki khep ba wan lynshop ka mariang, ma ngi ruh ngi pangnud ban ïohi ïa ki ummat jong ki nongrep. Tangba ngi kyrmen ba ki nongrep jong ngi kin ym duh mynsiem bad ba kin nang ïai trei shitom kham tyngeh ha ki aïom ki ban wan. Na ka liang ka sorkar ka dei ban phah ïa ki lad jingïarap kiba mardor sha ki nongrep khnang ba kin ïoh ïa ka jingkyrmen bad jingkyrshan.
