Shillong, Naiwieng 17
Ka dor jong ki ïingbasa ha Ahmedabad, Gujarat bad kumjuh ka bai liengsuiñ ki la kiew kynsan na ka daw ba bun na ki paidbah ki la pynkhreh ban leit sakhi ïa ka jingïakhun final jong ka kriket World Cup hapdeng ka India bad ka Australia ka ban long ha ka Sngi U Blei ha Narendra Modi Stadium.
Kumba katei ka jingïakhun final jong ka world cup ka la nangkiew ha ka jingdon ki paidbah nongpeitkai, ka dor jong ka bai ïingbasa na ka bynta shimiet ka la kiew sha ki T. 2 lak ha ki ïingbasa kiba ïoh ïa ka kyrdan san khlur (five-star) kiba don ha katei ka nongbah, katba kiwei pat ki ïingbasa ruh ki la kiew haduh hynñiew shah ka dor.
“Ki nongwan sakhi ïa katei ka jingïalehkai final ha ka World Cup kam dei tang kiba napoh ri India, hynrei ki paidbah na kylleng ki ri ka pyrthei kum na Dubai, Australia bad South Africa ki kwah ban wan ban sakhi ïa katei ka jingïalehkai,” la ong u President ka Federation of Hotel and Restaurant Association of Gujarat u Narendra Somani.
“Ki la don kumba 5,000 ki kamra ha ki lai tylli ki ïingbasa (three stars bad five star) kiba ha Ahmedabad, katba haba kheiñ lang baroh kiba don ha Gujarat ki long haduh 10,000. Ka jingngiam jong ka Narendra Modi Stadium ka long kumba 1.20 ngut ki briew bad ngi khmih lynti ba kumba 30,000 haduh 40,000 ki paidbah kin wan nabar ri ban sakhi ïa kane ka jingïalehkai,” u la bynrap.
Kumba ka jingdawa ïa ki kamra ha ki ïingbasa ka la nangkiew, ka dor jong ki ruh ka la nangkiew stet bha. U la ïathuh ba ka dor kaba mynshwa na ka bynta ki kamra ha ki ïingbasa ka long kaba kham duna, hynrei mynta ki la kiew naduh T. 50,000 haduh T. 1.25 lak.
“Ki paidbah ki la thmu ban thied ïa ki tiket liengsuiñ hashwa ban kin ïoh ïingbasa. Ka dor jong ki kamra ka la nangkiew ym tang ha Ahmedabad, hynrei ha kylleng ki nongbah kiba ïoh ban pynlong ïa ki jingïalehkai,” u la bynrap.
Ka jingthied online na ka bynta ki kamra jong ki ïingbasa (five-star hotels) ka la kiew sha ki T. 2 lak na ka bynta shimiet. Ki dor ba la pynpaw na ka bynta ki ïingbasa kum ka ITC Narmada bad ka Hyatt Regency ki long palat ïa ka T. 2 lak na ka bynta ka miet jong katei ka jingïakhun final.
Watki ki ïingbasa (non-star hotels) ki la kiew ha ka dor jong ki haduh hynñiew shah.
Ka dor jong ka bai liengsuiñ kiba wan na Chennai ka long kumba T. 5,000, hynrei mynta ka la kiew sha ki T. 16,000 shaduh T. 25,000.
