Shillong, Naiwieng 17
Ka kynhun ïalehkai phutbol ka India ka la khur ïa ka jingjop ha ka wat kaba ar jong ka lympung ïaknieh FIFA World Cup 2026 bad ka AFC Asian Cup Saudi Arabia 2027, hadien ba ka la lah ban pynliem noh ïa ka Kuwait da 1-0 kol ha ka sngi Palei ha Jaber Al-Ahmad International Stadium kaba ha Kuwait.
Kane ka nam jop ka la wan urlong lyngba u Manvir Singh uba la ïoh thep kol ha ka minit kaba 75 na ka bynta ban khur ïa ki lai point.
U Manvir u la lah ban thep ïa katei ka shi kol lyngba ka jingïarap pynbuh da u Lallianzuala Chhangte na ka bynta ban pynlong ïa ka India ban khur ïa ki lai point.
Ka Kuwait ha kane ka jingïalehkai ka la hap ban ïalehkai sa tang shiphew ngut ki rangïalehkai namar u Faisal Alharbi u la ïoh pdiang ar tylli ki yellow card hadien ba u la rah ïa ka kjat shalor bad leit dei ïa u Chhangte shwa ban kut ka jingïalehkai.
Lyngba kane ka jingjop ka India kan pynkhreh ban ïakhun sa bad ka Qatar kaba dei ka lahduh jong ka dewbah Asia ha ka 21 tarik mynta u bnai ha Bhubaneswar.
Ha kane ka lympung ïaknieh, ka India ka la don ha ka Group-A ryngkat ka Qatar, Kuwait bad ka Afghanistan, ha kaba ka kynhun kaba wan ha ka kyrdan ba hakhlieh na kane ka group kan ïoh rung sha ka wat kaba lai jong ka FIFA World Cup qualifiers.
Ka India kaba don ha ka kyrdan ba 106 ka la lah ban pynliem teng ïa ka Kuwait (149th) lyngba ka tie-breaker ha ka final jong ka SAFF Championships 2023 kaba la long ha Naitung.
