Raipur, Naiwieng:
Ka jingthep vote ka la sdang ha ka step jong ka Sngi Thohdieng na ka bynta kaba ar bad kaba khatduh jong ka ilekshon Assembly ha Chhattisgarh. Ha kane ka ilekshon ki la don kumba 958 ngut ki kyrtong kiba la don bynta ban ïakhun kiba kynthup ïa u Myntri Rangbah u Bhupesh Baghel, u Deputy CM T S Singh Deo, phra ngut ki Myntri ka jylla bad saw ngut ki dkhot jong ka Parliament ki ban ïakhun na ka bynta ki 70 tylli ki konstitwensi.
Ka jingthep vote ka la sdang ha ka por 7 baje ha ki 9 tylli ki jaka thep vote kiba don ha ka thaiñ ba shahktah jur na ki kam pyntriem jong ki lehnoh Naxal ha Bindranawagarh konstitwensi ha Gariaband distrik na ka bynta ban pynïoh ïa ki lad jingïada bad ka por ba la buh ban pynkut ka la long ha ka por 3 janmiet.
Ka por thep vote ha baroh 70 tylli ki konstwensi ka la long naduh ka por 8 baje mynstep haduh ka por 5 baje janmiet, lait noh tang ha kine ki 9 tylli ki jaka thep vote, la ïathuh ki heh ba dei khmih.
Ïa ki jaka thep vote la buh ha Kamarbhaudi, Amamora, Odh, Bade Gobra, Ganwargaon, Gariba, Nagesh, Sahbinkachhar bad Kodomali.
Ka bynta kaba nyngkong jong ka ilekshon na ka bynta ki 20 tylli ki konstitwensi kiba don ha ka jylla kaba la shah ktah jur ha ki kam pyntriem jong ki lehnoh, kaba don ïa 90 ngut ki dkhot ha Assembly, ka la long ha ka 7 tarik, Naiwieng ha kaba kumba la sakhi la shem ba ki la don bun bha ki nongthep vote bha ha kaba kane ka la kot sha ka 78 per cent.
