Fatih, Naiwieng:
Uwei u nongjngoh kai pyrthei uba dei nong Britain u la shah kem noh hadien ba u la dep pyniap dusmon ia ka kurim kaba dang 26 snem ka rta da kaba dung pyniap da u ‘Screwdriver’ hapoh ka kamra ïingbasa ba ki sah hapoh Turkey. Ki bor pyniaid katei ka ïingbasa ki la shem ia ka metiap jong katei ka briew napoh ka kamra ba kitei ki shijur ki thiah ha katei ka ïingbasa kaba don hapoh ka distrik Fatih Mevlanakai ha ka Sngi Ba-ar.
Ki nongtrei jong katei ka ïingbasa ki la iathuh ba ha katei ka sngi ki la ïohsngew ia ka jing lynñiar jong katei ka briew hapoh katei ka kamra bad hadien ba la leit peit la shem ia katei ka briew ba ka la thiah iap ha madan ha ryngkat ka jinglyng-kien ka snam ha baroh kawei ka kamra. Hadien kane, ki pulit bad ki briew jong ka kynhun ka koit- ka khiah, ki la leit poi sha katei ka jaka bad ki la pynbna ba katei ka briew ka la dep khlad naduh shuwa ban don ba lap ia ka ha katei ka kamra. Ki nongpeit bniah ki la iathuh ba katei ka briew ka don ia 41 tylli ki dak mong kiba la shah dung pynmynsaw da utei u nar ha ki bynta ka ryndang bad ha baroh ki bynta jong ka met jongka.
Tang hadien kumba katto katne kynta ba la wad bniah bad bud dien sani halor kane ka jingjia, ki pulit ki lap ia utei u kurim uba la don 28 snem ka rta bad uba dang phong hi ia kijuh ki jaiñ kiba la khah snam bad uba dang ialeh ban ioh mih bad phet krad noh napoh katei ka hotel.
Hadien ba la rah ia u sha thanat, utei u briew u la phla ia ka jingleh kam sniew jong u bad u la phla ruh ia ka jaka ba u la leit bret ia kitei ki tiar kiba u la pyndonkam ha ka por ba u pyniap ia ka kurim jong u ha katei ka sngi. Utei u briew u la iathuh ba u la bret noh ia kitei ki tiar hapoh ka jaka leit bar ‘Toilet’, ha kaba ki pulit ki la leit wad bad shem shisha ia kitei ki tiar. Hadien kata, ki pulit ki la pynshong noh syndon ia u hapoh patok bad la pynngat ia u ha ki kyndon pynkheiñ aiñ kiba iadei bad ka kam pyniap briew kaba u la leh.
La ong ba kine ki shijur ki la mih na England bad wan poi pat ha Istanbul ha ka 11 tarik jong une u Naiwieng bad ki la leit sah wai ha katei ka hotel ha ka 14 tarik u Naiwieng, ha kaba kane ka jingjia ka la jia.
Utei u briew u la phla ba katei ka kurim jong u, ka la ai ia u ia ki kynja jingdih droks bad hadien kata ka la mih ka jingïakynad hapdeng jong ki bad kaba la pynlong ia u ban leh ia katei ka kam runar.
Watla katta, ki pulit ki la iathuh ba kim shym la lap eiei pat na ka met lane na ka jingdon- jingem jong kitei ki arngut haba iadei bad utei u droks bad kumta ka jingtohkit kan dang iaid shakhmat ban lap ia ka daw jong ka jingpyniap.
