Gaza City, Naiwieng:
Ka tnat ka koit- ka khiah jong ka Hamas hapoh Gaza, ka la pyntip ba ki don haduh 24 ngut ki nongpang kiba thiah pang ha ka hospital Al-Shifa kaba don hapoh Gaza bad kiba la duh ei noh ia la ka jingim hapoh jong kine ki 48 kynta ba la leit tang namar ka jingbym don bor ding bad kiwei de ki jingthud ha baroh ki liang namar ka jinghiar thma bad jingleh kput jong ka Israel ia ka Gaza.
Ha ka Sngi Nyngkong, ka tnat ka koit ka khiah na Gaza ka la pyntip ba ki la don lypa kumba 27 ngut ki ba la heh bad 7 ngut ki khyllung kiba la khlad ha katei ka hospital Al-Shifa jong ka Gaza namar ka jingkyrduh umphniang kali bad katei ka hospital kam lah shuh ban pynkit ia kitei ki nongpang sha kiwei pat ki jaka kiba lah ban pynim bad ban ai iaki ka jingsumar kaba dei.
Namar la ong ba katei ka hospital ka long ka jaka ba kongsan tam ba ka Israel ka la phai khmat ha kane ka sien iakhun thma jongka pyrshah ia ki lehnoh Hamas jong ka Palestine. Kumba la iohi ia ka khubor na ki heh ka tnat shipai jong ka Israel ha kine ki sngi lei, la iohi ba ki la pynsaphriang ia ki video ba la lap ia ki tiar siat bad ki tiar pynbthei na katei ka hospital bad na ka liang ki shipai ka Israel ki la kynnoh beit ba kitei ki tiar ba la lap na katei ka hospital ki dei kiba la leit ban buhrieh da ki lehnoh Hamas baroh shi katta.
Katba, na ka liang ki lehnoh Hamas pat ki la kyntait ia katei ka jingkynnoh jong ki shipai ka Israel bad ong ba katei baroh ka long tang ka jing pharep bad ka jing pynksan jong ka Israel namar ka kwah ban thombor bad pynjot ia ka Gaza baroh kawei khlem map shuh wat ia ki riew paidbah ne ki lanot kiba thiah hapoh ki hospital ruh kumjuh.
Hynrei la ong ba ki shipai ka Israel naduh ka Sngi Balang ki la sdang ban leit rung bad khynra ha kylleng ki bynta bad ki kyndong- kynshrot jong katei ka hospital baroh kawei bad ki la kam bad pynshisha ruh ia ka jinglap jongki ia kitei ki tiar siat bad tiar pynbthei jong ki lehnoh Hamas na katei ka jaka. Ha kajuh ruh ka por ki shipai Israel ki la kam ba ki la sdang ban lap ksai ia ka jaka ba ki lehnoh Hamas ki buhrieh bad set ia kito kiba la shah rahbor naduh ka 7 tarik u Risaw.
Kumta ruh ka tnat ka koit ka khiah jong ka Hamas hapoh Gaza, ka la ong ba katei ka jingleit khynra jong ki shipai Israel ha katei ka hospital ka la pynthud bad pynwit ia ka rukom treikam bad ka jingai jingsumar sha ki paidbah kiba don hapoh jong katei ka jaka sumar.
