Shillong, Naiwieng 19
Ka Australia ka la ïoh rah ïa ka nam lahduh jong ka lympung Cricket World Cup bad kane kan dei ruh ka sien kaba 6 ba ka Australia ka la rah ïa ka nam lahduh jong kane ka lympung ïalehkai kriket kaba heh tam ha ka pyrthei.
Kane ka jingïoh rah jong ka Australia ïa ka nam lahduh jong ka World Cup ka la wan hadien ba ka la lah ban pynliem noh ïa ka India da 6 wiket ha ka jingïalehkai final kaba la long ha Narendra Modi Stadium ha Ahmedabad, Gujarat.
Haba phai sha ka jingïa-lehkai ka Australia kaba la jop ka jingkynting pisa ka la kam trai ban kawang bol nyngkong bad kane ka rai ka la seisoh, ha kaba ka la lah ban khanglad ïa ki nongtied ka India ba kin lah ban kamai tang 240 run na ki 50 tylli ki over bad hap lut baroh ki wiket. U KL Rahul u la tied 66 run, u Virat Kohli u la tied 54 run bad u Rohit Sharma u la tied 47 run. U Mitchell Starc u la khur 3 wiket
Haba beh ïa kane ka thong, watla ka Australia ka la kamai run sted hynrei tang ha ka over kaba 7 ka la duh 3 wiket bad kamai 47 run hynrei ka jinglah ban ïaleh-kai jai jai jong u Travis Head uba la tied marwei haduh 137 run na ki 120 tylli ki bol bad u Marnus Labus-chagne uba la tied 58 na ki 110 tylli ki bol, ka la lam lynti ïa ka Australia sha ka lynti jong ka jingjop.
Ha shwa ba ka Australia kan kot sha ka thong, na ka liang u Mohammed Shami bad Jasprit Bumrah ki la wanrah ka jingkyrmen ban lah khanglad ïa ka Australia hynrei ka jingbym lah jong kiwei pat ki nong-kawang bol ban khur wiket, ka Australia ka la lah ban par jai jai sha ka thong.
Lah ban pynkynmaw ba ka sien ba nyngkong eh ba ka Australia ka la ïoh rah ïa ka nam lahduh ka World Cup ka la dei ha u snem 1987, nangta ha u snem 1999, 2003, 2007 bad 2015 bad mynta 2023.
Ha u snem 2003 ruh ka Australia ka la pynliem hi ïa ka India ha ka final jong ka World Cup bad mynta ka kynti ruh ka la lah biang.
