Nongstoiñ, Naiwieng 19
Ka kynhun ïalehkai jong ka Upper New Nongstoiñ kala ïoh ban khur ïa ka jingjop ha ka Super Division ka lympung ïalehkai phutbol ïa kaba la tip kum ka NDSA Premier League Football Tournament 2023-24.
Ka nam jop jong ka Upper New Nongstoiñ kala wan hadien ba kala lah ban pynliem noh da 2-0 kol ïa ka Mawliehbah Sports Club ha ka jingïalehkai pyrshah kaba la long ha ka sngi Saitjaiñ jong ka taiew ha madan NDSA, ha Nongpyndeng.
Ka jingjop ka Upper New Nong -stoiñ kala wan lyngba ki kol ba la ïoh ban thep da u Johnderful Dkhar ha ka minit ba 32 bad u Shaipharlin Nongsiej ha ka minit ba 34.
Haba phai pat sha ka jingïakhun ha ka 1st Division, ka jingïalehkai hapdeng ka Nonglwai II pyrshah ïa ka Marskuin Sports Club kala kut noh ha ka jingïakhaid khlem da don mano mano kiba ïoh ban pynkhih jar.
Na ka liang ka tournament committee ka NDSA kala pyntip ba ka jingïalehkai ha ka 20 tarik mynta u bnai ha ka Super Division kan long hapdeng ka Tiehrit pyrshah ïa ka Pyndengrei ha ka por 2 baje nohphai sngi katba ha ka 1st Division ka jingïalehkai kan long hapdeng ka Nongstoiñ Football Team pyrshah ïa ka Mawtynrong SS&CC ha ka por 12.05 mynsngi.
