Jowai, Naiwieng 19
Ka Demthring Sports Club ka la rah ïa ka nam lahduh ka lympung ïalehkai 1st Division Football Tournament kaba tip kum “11th Chatister Kharkongor Memorial Trophy” ba la pynïaid da ka West Jaintia District Sports Association (WJDSA).
Kane ka la wan hadien ba ka Demthring ka la pynliem ïa ka Wahiajar Sports Club da 2-1 kol ha ka jingïakhun final kaba la long ha madan Kiang Nangbah Stadium, Lad-thadlaboh, Jowai ha ka sngi Saitjaiñ.
Haba phai sha ka jing-ïakhun final hapdeng kitei ar kynhun kala long kaba itynnad bad ïathaiñ ha kaba ka jingïakhun jong ka kylla step bad kylla miet ka la kut noh ha ka jingïakhaid da mar 1-1 kol.
U Maidong Mukhim ka Demthring u la ïoh thep ïa ka kol tang ha ka minit ba 2 ha ka kylla step.
Ka Wahiajer kaba la shah tam kam shym la duh jingkyrmen hynrei ka la ïakhun tyngeh bad dei ha ka minit kaba 25 ba ka la lah ban pynphai ïa kane ka shi kol lyngba ka kol ba la thep da u Niwan O Gatphoh.
Ban ïoh ïa ka rai rem rai jop la rah noh ïa ka jingïakhun sha ka ‘Extra Time’ kaba mar 10 minit shiliang bad dei hangne ka Demthring ka la ïoh ban tam da shi kol lyngba ka kol ba la thep da u Lounidajied Ryngkhlem ha ka minit kaba 104, kane ka shi kol ka la neh haduh ba kut ka jing-ïalehkai.
Ha kane ka jingïakhun final la wan sakhi lang da u Bah Finely Pariat uba dei u khun jong u Late Chatister Kharkongor bad uba dei ruh u General Secretary ka Meghalaya State Olympic Associa-tion ha ka jingdonlang ki nongïalam ka WJDSA kata u Working President u Bah EMH Passah, u General Secretary u Bah Lammat O Laloo, u Vice President u Bah Patrick Lamare, u Football Secre-tary u Bah Nangebor Suting bad kiwei kiwei nalor ka jingwan ai jingkyr -shan ki riew ieit phutbol kynthup naduh ki longkmie longkpa, ki samla shynrang kynthei haduh ki khynnah.
Haba kut ka jingïaleh-kai la sam ïa ka khusnam Trophy bad song pisa sha ka lahduh ka Demthring kaba ïoh 30 hajar tyngka katba ka Wahiajer kaba wan ba ar ka la ïoh ïa ka song pisa kaba 20 hajar tyngka ryngkat ka Trophy.
Ïa ka nam ‘Man of the Match’ ha kane ka jingïa-lehkai la ïoh rah da u Babitlang Dkhar, ka nam Best Goalkeeper la ïoh rah da u Fourme Dkhar baroh ar ki dei na ka Demthring. Ka nam Top Scorer la ïoh rah da u Nidaioh Dhar jong ka Mukhla Ever-green bad ka nam Player of the Tournament la ïoh rah da u Dawanbiang Passah jong ka Nangbah Iawmusiang.
Ka Demthring bad ka Wahiajer ki la kiew sha ka kyrdan Super Division jong ka aiom ïalehkai ban wan jong u snem 2024.
