Ka pang ka shitom kaba ktah eh ïa ka jingmut jingpyrkhat jongngi ki briew. La ngi duk ne ngi riewspah ngim lah lait na ka pang ka shitom. La phi long syiem ne patsha, u nongrep ne nongbylla ym don ba lait na ka pang ka jhia. Ka pang ka shitom ka pynjynjar ïa ka met bad ka mynsiem. Ka pang ka shitom ka pynjot ïa ka jingim bad kam ai thiah ai dem ïa ngi ki briew. Haba don ba pang ba shitom ka pynkhuslai ïa ka ïing baroh kawei. Ngi ki briew ngi im ha ka jynjar ka khuslai haba ka pang ka shitom ka ban ïa ka met bad ka mynsiem. Kham ñiar u ban lait na ka pang ka shitom ha ka jinglong briew. U briew hi u don ka mynsiem sngewdiaw haba pang ka shitom ka ban ha ngi ki briew. La phi dang khynnah ne phi la rangbah, phi dang samla ne la tymmen ka jingpang bad ka jingshitom ka thom naphang. Ka ïing ka sem jongno jongno ruh ka pang ka shitom haba ban ka jingpang. Namar ka jingim jongngi ki briew ngim long kum ki maw ki dieng. Ngi ki briew ngi pher na kiwei ki jingthaw ngi don snam, kumta ngi pang ngi shitom. Ym don kiba khraw ym don kiba rit ka jingpang bad jingshitom ka ban ïa ngi ki briew. U briew u long halor ki Ar, ka jingbha bad ka jingsniew. Ka pang ka shitom ka long ka dak kaba pynsngewsih bad pyndiaw ïa ngi ki briew. Ki longïing longsem ki shem jynjar haba ka pang ka shitom ka wan hap ha ngi ki briew. Kumta ka pang ka shitom ka long ka nongpynjot ïa ka longbriew manbriew.
C. B. Iawphniaw
