Shillong, Naiwieng 19
Ka Shillong Lajong Foot-ball Club ka la khur ïa ka jingjop kaba nyngkong eh ha ka lympung I-League jong ka aiom 2023-24 hadien ba ka la pynliem ïa ka Gokulam Kerala Football Club ha ka jingïa-lehkai kaba la long ha ka sngi U Blei ha madan SSA Stadium, Polo.
Haba phai sha kane ka jingïalehkai, ka Shillong Lajong FC ka la lah ban pynliem noh da 3-1 kol ïa ka Gokulam Kerala FC, kaba la dei teng ruh ka lahduh jong ka I-League.
Kumba ka long mynta, ka Shillong Lajong ka la kamai 6 point na ki 4 tylli ki jingïalehkai kata ban ïakhaid ha baroh ki 3 tylli ki jingïakhun ba la dep bad kane kawei ka jingjop bad ruh ka la kiew sha ka kyrdan kaba hynriew, katba ka Gokulam Kerala pat ka la mad ïa ka nam rem kaba nyngkong eh jong kane ka aiom.
Ka Gokulam Kerala hadien kane ka jingshah rem, ka la hiar sha ka kyrdan kaba lai na ki 10 point ba ka la khur na ki 5 tylli ki jingïalehkai, katba ka Mohammedan Sporting ka dang bat ïa ka kyrdan ba nyngkong na ki 13 point ba ka la khur na ki 5 tylli ki jingïalehkai.
Haba phai sha ka jing-ïalehkai, dei ka Shillong Lajong FC kaba la ïoh ban khyrwit kol nyngkong ha ka minit kaba 29 lyngba u Daniel Goncalves, hynrei shwa ban wai ka kylla step, ka Gokulam Kerala ka la ïoh ban pynphai ïa kane ka shi kol, kaba la wan ha ka minit kaba 43 lyngba u Francisco Perdomo.
Haba bteng ïa ka kylla miet, ki rangïalehkai ka Gokulam ki la pynshong beit ha ka jingmut ban mih nangne ryngkat bad ka shi point hynrei kane ka la shah ktah ha ka minit kaba 75 ha kaba ka Shillong Lajong ka la ïoh ïa ka penalty ha kaba u Renan Paulino u la thep jlang shapoh ka kol bad ban pyntam da 2-1 kol.
Hashwa ban wai ka jingïalehkai, ka Shillong Lajong lyngba u Hardy ka la ïoh ban thep syndon ïa ka kol kaba lai kaba la biang pura ban khur ïa baroh ki 3 point.
Hadien kane ka jing-jop, mynta ka Shillong Lajong FC kan pynkhreh pat ban ïakhun pyrshah ïa ka Delhi Football Club ha ka 22 tarik mynta u bnai ha ka por 2 baje janmiet ha madan SSA Stadium, Shillong, katba ka Goku-lam Kerala pat kan ïakhun pyrshah ïa ka Churchill Brothers ha EMS Corpo-ration Stadium, Kozhikode, ha ka 26 tarik Naiwieng.
