Shillong, Naiwieng 19
Ka Rangdajied United Football Club ka dang pynneh ïa ka jingkyrmen jong ka, ban dang ïai neh ha ka All India Football Federation Third Division League (ba la tip ruh kum ka I-League 3) hadien ka jingkhur jingjop ha ka jingïakhun pyrshah ïa ka Jeppiar Institute of Technology Football Club kaba na Tamil Nadu.
Haba phai sha ka jingïalehkai ka Group-C kaba la long ha ka sngi U Blei ha Goa, ka Rangda-jied United ka la jop da 1-0 kol bad ïa kane ka kol la thep da u Knerktilang Buam ha ka minit kaba 66 kaba la biang pura ban khur ïa ki 3 point.
Lyngba kane ka jing-jop, ka Rangdajied United FC ka la kamai 7 point na ki 3 tylli ki jingïalehkai bad kam pat shah rem ha kane ka lympung.
Ka jingïalehkai ba khat -duh jong ka Rangdajied ha ka group kan long pyrshah ïa ka Dempo Sports Club ha ka sngi Ba-ar ha ka por 3:30 janmiet. Ka jingjop ne ka jingïakhaid ha kane ka jingïalehkai kan pynthikna ba kan dang ïai neh ha kane ka lympung bad rung sha kawei pat ka round.
Kumba ka long mynta ka Rangdajied United ka don ha ka kyrdan ba ar na ki 7 point, ka Dempo ha ka kyrdan ba nyngkong na ki 9 point bad ka Kickstart FC Karnataka ha ka kyrdan kaba 3 na ki 4 point.
