Dehradun, Naiwieng:
Kumba la ïoh jingtip na ki lad pathai khubor, la ong ba ka Kedarnath Dham jong ka Uttarakhand ka la paw ba ka la long ka jaka kaba hakhlieh eh haba ïanujor bad kiwei pat ki jaka ha ki jylla ha ka ri ha kaba ïadei bad ka jingbun jong ki plastik kiba la saphriang hadien ba la dep ban pyndonkam.
Ka Digital Deposit Refund System ïa kaba la pyntreikam na ka bynta ban lum ïa ki plastik kiba la saphriang kylleng ha Kedarnath Dham jong ka Uttarakhand ka la wan kaba nyngkong eh ha ka ri, katba ka Baini Sena Self Help Group Haldwani ka la wan ba-ar ha kaba ïadei bad ka jingpyntreikam halor kane.
Kane ka jingpyntreikam, ka la long hadien ba ka Uttarakhand High Court, ka la dep ban hukum ïa ka sorkar jylla ba ka la dei ban sdang noh ban pyntreikam da ka Digital Deposit Refund System na ka bynta ban lum ïa ki bilor plastik ha kylleng ka jylla. Ïa kane ka skhim ïa mynta la pyntreikam ha ka thaiñ Kedarnath Dham.
Hapoh ka jingtreikam jong kane ka shim, ki nongleit ïaid riewblei lada ki leit ban thied ïa ka um kaba T. 10 shi bilor kin sa ïoh biang ïa ka lada ki leit ban pynphai biang ïa bilor plastik.
Ïa kine ki hukum la pynmih da ka kynhun nongbishar jong u Chief Justice Vipin Sanghi bad u Justice Manoj Tiwari ha ka por ba ki la bishar bniah ïa ka jingmudui Public Interest Litigation (PIL) ba la buh da u Jitendra Yadav jong ka Almora, uba dei u trai shnong jong ka Delhi.
Ka jingbishar biang halor kane ka jingmudui kan sa long ha ka 28 tarik, Naitung.
U Dushyant Mainali, uba long u nongmihkhmat jong u nongmudui u la ong ba katkum ka jingmudui PIL la pynshisha ba ka la don ka jingjur jong ka jingpynjaboh ha ka jylla namar ka jingbym lah jong ka jylla bad ki heh ba dei khmih ban bud ïa ki kyndon jong ka Solid Waste Management bad ka jingbym bud ryntih halor ki jingpyrkhing ne ban shim ïa ka jingkitkhlieh halor ka jingwanrah ïa ka jingkhuid.
Ka PIL ka la dawa ba la dei ban don ki hukum na ka ïingbishar sha ka sorkar jylla ba kan shim noh kyrkieh ïa ki sienjam ban pyntreikam pyrkhing ha kaba ïadei bad ki kyndon jong ka Plastic Waste Management Rules 2016 bad jong ka Uttarakhand Plastic and ka Non-Biodegradable Garbage (Regulation of Use and Disposal) Act, 2013 bad ban pyntreikam pyrkhing ruh ïa ka Extended Producer’s Responsibility kumba la long ka hukum ba la ai naduh ka 16 tarik, Rymphang jong u snem 2021.
