Shillong, Naiwieng 19
Ka Pomsanngut Sports Club ka la ïoh rung sha ka semi-final jong ka First Division ka lympung ïalehkai phutbol ba la pynïaid da ka Tyrsad Area Sports Association (TASA) ha madan Tyrsad.
Kane ka jingïoh rung sha ka semi-final ka la long hadien ba ka Pomsanngut Sports Club ka la lah ban pynliem noh ïa ka Rangshangkham Sports Club da 1-0 kol ha ka jingïalehkai kaba la long ha ka sngi Saitjaiñ ha madan shnong Tyrsad.
Ha kane ka jingïalehkai, ïa kane ka shi kol jong ka Pomsanngut la ïoh ban thep da u Enes Nongsiej ha ka minit ba 87.
Haba phai pat sha ka jingïaleh-kai ha ka kyrdan Second Division, ka Laitmawhing Sports Club ka la lah ban pynliem noh ïa ka Wahlyngkien Ramklang Sports Club da 1-0 kol bad ïa kane ka shi kol la ïoh ban thep da u Arjun Sawkmie ha ka minit kaba 11.
Haba phai pat sha ka jingïakhun ha ka kyrdan Third Division, ka Mawkynroh Sports Club ka la pynliem noh ïa ka Lyngdoh Phanblang Sports Club da 2-0 kol bad ïa kine ki kol la ïoh ban thep da u Presharsing Lyngkhoi ha ka minit ba 24 bad u Kening Kharshillot ha ka minit ba 40.
