Mumbai, Naiwieng:
Ki pulit jong ka nongbah Mumbai ki la ïai bteng ban pynlong ïa ki jingleit khynra sha kylleng ki jaka halor ka jingthmu ban lah ban pynduh pyndam syndon ïa ka jingpyndonkam ïa u drok.
Ha kaba ïadei bad kane ka bynta, ka kynhun Anti-Narcotics Cell (ANC) jong ki pulit ka Mumbai ki la pyntip sha ka State Human Rights Commission (SHRC) ba ki la don bun tylli ki jaka ïa kiba la shah pyndonkam bakla da kito ki briew kiba la kyrni ha ka jingdih drok.
Kumba la khmih bniah, la shem ba kine ki runar ki ju pyndonkam man ka sngi ïa ki jaka kiba la shu ieh khlem pyndonkam ne ki jaka ba kham sha kyndong.
Ki pulit ki la ïathuh ba ha kum kine ki jaka, ki la ïoh jingmudui shaphang ka jingdon jong ki kam beaiñ ba la leh ha kitei ki jaka bad ka jingleh ïa ki kam thombor pyrshah ïa ki kynthei.
Ka la don ka jingpynjur ïa ka jingkhmih bniah bad la buh shuh shuh ïa ki jingpynshai ding ilektrik bad ki CCTV Camera ha kine ki jaka.
Ka ANC ka la ïathuh ruh ïa ka Commission ba la buh ïa ki QR Codes ha kine ki jaka na ka bynta ban pyntikna ba ka kynhun jong ki heh pulit bad ki pulit pahara kin leit ban khmih bniah ïa kine ki jaka.
Ka SHRC, ka la khmih bniah ha kaba ïadei bad ka jingïohlum kaiphot, ha kaba la pynbna ba ki la jur bha ki kam thombor kiba long pyrshah ïa ki kynthei ha kylleng ka nongbah, khamtam ki jaka bym don basah briew ne ki jaka ba la shu ieh shrah ha kaba la ju pyndonkam man ka sngi da ki briew kiba kyrni ha ka jingdih drok.
Ka kaiphot ka la ïathuh ba nalor ki jaka ba la shu ieh shrah kum ka Shakti Mills ha kaba kawei ka briew ka la shah leh beijot ha ki shiphew snem ba la leit da ki san ngut ki briew kiba dih drok, ki la don sa kiwei kiwei pat ki jaka ha ka nongbah ïa kiba la shu ieh shrah kiba la kylla long ki ktem jong ki nongkhaïi bad nongdih drok.
Kumba la ïathuh ka tyllong khubor, la ong ba ha Shakti Mills ki la ju ïai jia ki jingjia shah leh beijot jong ki kynthei na ka por sha ka por.
Ka kynhun nongbishar ba la khlieh da u Chairperson jong ka SHRC u Justice K K Tated bad u dkhot ka kynhun u M A Sayeed ka la hukum ïa u Mumbai Police Commissioner ka BMC bad ïa u Joint Commissioner ba ki la dei ban ai jubab ha kaba ïadei bad ka jingthoh bad ban ithuh ïa ki jaka ha ka nongbah ïa kiba la kylla long ki ktem jong ki nongdih bad jong ki nongkhaïi drok.
Ka kynhun nongbishar ka la phah batai shai ruh ha kaba ïadei bad ki jingthmu pyntreikam halor ka jingtehlakam halor kane.
