New Delhi, Naiwieng:
Ka Mayor Shelly Oberoi ka la tangon tyngeh ïa kawei ka kompeni shimet kaba la shah jied da ka Municipal Corporation of Delhi na ka bynta ban kit ïa ki jaboh, naba ka khlem leit kit ïa ki jaboh na ka thaiñ kaba don ha West Zone, la ïathuh ki heh ba dei khmih ha kine ki khyndiat sngi ba la leit.
Ka Mayor ka la pynlong ïa ka jingïalang bad ki nongmihkhmat jong ka kompeni ha ka sngi Palei ha kaba ïadei bad ka jingïakren halor ki mat kiba kyrkieh ban pyntreikam, ki la ong.
Ka Mayor ka la maham ba kane ka kompeni kan shah kyntait noh lada kam leit kit ïa ki jaboh na katei ka jaka.
Ka Oberoi ka la ong ba ka Municipal Corporation ka la don jingthmu ban khmih bniah ïa ki nongpynkhuid jaboh ha kaba ïadei bad ka jingtreikam jong ki kaba man ka sngi.
Ka la ong ïa kane ha ka por ba ka la ïakren bad ki nongthoh khubor ka la ong,”Ngi la don jingthmu ban khmih bniah ïa ki nongtrei kiba ju pynkhuid ïa ki jaboh jabaiñ bad ban khmih bniah ïa ki ha kaba ïadei bad ka kam kaba ki ju trei manla ka sngi. Lyngba kine ki jingkhmih bniah, ngin sa lah ban khmih bniah ïa ki ha kaba ïadei bad ki kam ba ki trei,” la ong ka Mayor.
Ha kaba ïadei bad ka jingbun jong ki jingjia shah dait ksew, ka la ong, ba kin sa don ki jingkhmih bniah ha kylleng ki jaka ba ju pynduh khun ïa ki ksew bad ka MCD kan sa treikamlang bad kiba bun ki seng treimon sngewbha.
Ha kaba ïadei bad ka mat halor ki ksew shang lymwir, ka la ong, ki la don kumba saw tylli ki jaka ba la buh ïa ki kiba hapoh hapoh ka jingkhmih jong ka sorkar Delhi.
Ha kaba ïadei bad ka jingbuh jingkylli halor ka Waste-to-Energy Plant, ka la ong, ka Plant kaba thymmai kumba la thmu la dei ban buh ha Narela Bawana, ha kaba ka la bynrap, “Mynta ngi dang buh jingthoh bad ha ki lai snem, yn sa pyntreikam ïa kane”.
