New Delhi, Naiwieng:
U Myntri Rangbah jong ka Delhi u Arvind Kejriwal ha ka sngi Thohdieng u la ong ba ka seng Aam Aadmi Party (AAP) kan sa jop ha ka jingïakhun ïa ka ilekshon Lok Sabha 2024 ha Delhi, wat lada un shahkem.
U la ong shuh shuh sha ki nongbud jong ka seng kumne, “Ngam don jingsheptieng ei ei ban leit sha patok.” Ha ka jingai jingkren ha ka por ba don ka jingïakynduhlang jong ki nongbud jong ka seng AAP ïa kaba la tip kum ka ‘karyakarta sammelan’ ha Tyagaraj Stadium kaba don ha Delhi, u Kejriwal u la ong, “Na ka bynta ka jingwanrah ïa ka jingkylla kaba khraw, ka Jail ka dei ka jingpynphuh pynphieng. Nga shong ha patok na ka bynta 15 sngi.
Kam shym la don kano kano ka jingpher ïa nga. Ngim shym thrang na ka bynta ka bor synshar, u la bynrap. “U la ong shuh shuh ba um sngewduhnong na ka bynta ka shuki Myntri Rangbah, u la bynrap shuh shuh da kaba ong, “Nga la long u Myntri Rangbah uba nyngkong ha ka pyrthei u ban iehnohkam hadien 49 sngi khlem da don kiba phah ïa nga ban leh kumta.”
“U la bthah ïa ki nongbud jong ka seng ba ki la dei ban leit jngoh sha man ki longïing ha ka nongbah ban sngapthuh la ki kwah ne em ïa u ba un bteng ïa ka kam kum u Myntri Rangbah, wat lada u shong patok, lada ka long kumta ne ban hiar shuki.
U la ong, “Ngi la hap ban leit sha man ki thliew ïing bad kylli na ki paidbah jong ka Delhi kaei kaba ki kwah. Ai ba kane kan long ka jingsdang ïa ka jingïalap ilekshon.”
U nongïalam jong ka seng AAP u la ong ba ka BJP kan ym lah ban pynrem ïa ka seng AAP ha Delhi bad ka dei namar kane ba ka la ïasuhbuit ban thep ïa ki nongïalam jong ka seng AAP hapoh patok.
