Shillong, Naiwieng 19
Ka Meghalaya Chess Association (MCA) kan pynlong ïa ka “1st Megha -laya International Open Grand-masters Chess Tournament 2023” ha kane ka nongbah naduh 12 haduh 20 tarik u Nohprah mynta u snem.
Kane ka long ka sien kaba nyngkong eh ba ka MCA ka lah ban wanrah ïa katei ka lympung ha kane ka nongbah. Ki nongïalehkai ki ban wan ïashim bynta ha kane ka lympung kin dei ki grand master na kylleng ka pyrthei kiba kynthup na Bangladesh, Sri Lanka, Zambia, Vietnam, Uzbekistan, Egypt, Thailand, USA bad kiwei.
“Ha kane ka lympung yn phiah ha ki ar bynta, kata Category ‘A’ kaba dei tang ki ‘rated player’ kiba lah ban ïashim bynta, katba ha ka Category ‘B’ ki dei kiba don tang hapoh 1599,” la ong u General Secretary ka MCA Bah Khraw-kupar Pajat.
“Kane ka lympung kan long ka jingïarap ban pynshlur ïa ki nongïa-lehkai ka Jylla ba kin don ïa ka ‘rating’ namar ngim pat ju don kum kine ki ‘rating tournament,” la ong u Bah Khrawkupar.
“Ka jingpynlut ha kane ka lympung kan long haduh T.1.33 klur. Na ka liang ka tnat ïalehkai ka la kular ban ai jingkyrshan T.60 lak, hyneri ïa mynta ka dang pyllait shwa T.25 lak. Ngi la ïoh jingïarap na ka All India Chess Federation (AICF) T.15 lak. Lada ngi kheiñ kyllum lang baroh ka dang long tang T.85 lak. Kum ka Synjuk ngim don pisa eiei, hynrei ka jingpynlut kan long kaba bun. Te kumta ngi kyntu ïa kito kiba don mynsiem ha kane ka jingïalehkai ba kin noh synñiang lem sha ka Synjuk khnang ba ngin lah ha ka ban pynïaid shaphrang ïa kane ka lympung ka ban long ha ka sien ka nyngkong eh ha ka nongbah,” la ong u Bah Nobleman Wanñiang, Treasurer.
Ha kaba ïadei bad ki khusnam na ka bynta ki nongjop ha kane ka lympung kin long baroh kumba T.30 lak tam.
Katkum ka jingïathuh da ki bor pynïaid ka MCA, la ong ba kiba bun ki nongïashim bynta kin dei napoh ri India bad kumba 10 ngut na ka Jylla Meghalaya ki ban ïashim bynta ha ka ‘A’ Category bad kumba 34 ngut ha ka ‘B’ Category.
