Shillong, Naiwieng 20
Ka jingbym lah ban pynurlong ka Meghalaya Football Association (MFA) ïa ki lympung ïalehkai ki kynthei ka la pynlong ïa ka kynhun ïalehkai ka Jylla ban mad ïa ka jingshah rem ha ka Senior Women’s National Football Championship.
Ha kane ka lympung, ka Meghalaya kaba don ha ka Group-E ka la mad ïa ka jingshah rem ha baroh saw sien ïakhun bad ka jingïaid lynti kane ka kynhun hapoh ka jingïalam ka Kong Ïaikyntiew Nongkynrih ka la poi sha kaba kut ha ka Sngi U Blei hadien ba shah rem ha ka Goa da 4-1 kol ha Sundargarh kaba ha Odisha.
Kham hashwa ka Meghalaya ka la shah rem ha ka Odisha, Gujarat bad kumjuh ha ka Arunachal Pradesh.
Baroh kitei ki saw kol kiba la shah thep ha ka Goa ki la wan hapoh ki 30 minit. Ka Pearl Fernandes ka la khur ïa ka hat-trick hadien ba ka la ïoh ban thep marwei haduh lai kol ha ka minit kaba 1, 27 & 29, katba ïa kawei pat la pynbud da ka Karishma Purushottam Shirvoikar (24). Hynrei ha ka kylla miet ka Meghalaya ka la lah ban pynphai kylla shi kol lyngba ka Marbarin Nongrum ha ka minit kaba 58.
Tang hadien katto katne por ka Meghalaya ka la hap ban ïalehkai sa tang shiphew ngut hadien ba ka ‘thei apkol ka Banrilang Lyngdoh Nongbri ka la shah sei da ka red card ha ka minit kaba 66 bad ha kaba kut ka la mad ïa ka jingshah rem.
Lah ban pynkynmaw dangshen ka MFA ka la pynthymmai ïa ki nongkitkam na ka bynta ka samoi treikam kaba saw snem (2023-27) hadien ba ka Synjuk ïalehkai kaba rim kam shym la lah ban pynlong ïa ki lympung ïalehkai ki khynnah kata ka Youth League lem bad ki lympung jong ki kynthei.
Hynrei katei ka Synjuk kaba thymmai ka la khmih lynti ban pynurlong ïa baroh ki lympung ïalehkai naduh kiba la heh la san (senior), ki khynnah (youth) bad kumjuh na ka bynta ki kynthei.
Kumba ka paw ka Jylla ka la shu shaniah tylli tang ha ka Shillong Sports Association (SSA), kaba la pynlong manla u snem ia ka lympung ïalehkai ki kynthei bad kumjuh na ka Subroto Mukherjee Football Cup ba la pynlong da ka tnat ïalehkai ka Sorkar Jylla.
