Shillong, Naiwieng 20
Ka Meghalaya Football Association (MFA) ka la dawa weng kam noh shi syndon ïa u Asst. Sports Director ka tnat ïalehkai jong ka skulbah NEHU, u Nantu Das uba la shah kynnoh ba u la jrong kti ïa kawei ka samla kynthei.
Kat kum ki khubor la ïathuh ba u Das uba khmih ruh ïa ki bor pahara (security), u la jrong kti ïa ka samla ha kawei ka jaka sah kaba don ha NEHU ha ka Sngi U Blei.
La ong ba katei ka samla ka la shah jied ban mihkhmat ïa kane ka skulbah ha ka Inter University Football Tournament ka ban long ha Odisha.
Halor kane ka jingjia, na ka liang ka Meghalaya Football Association ka la pynpaw ka jingsngewsih halor ka jingshah thombor ki kynthei Khasi. “Ka jing-leh utei u Asst. Director ka tnat ïalehkai jong ka skulbah NEHU ka long ban shu thom da ka bor ïa ki samla Khasi ki jong ngi,” la pynpaw u President ka MFA u Bah Hamletson Dohling.
“Kum ka MFA kaba peit ïa baroh ki nongïalehkai bad kumjuh ïa ki rephri, ngi dawa ba ka NEHU ka dei ban pynshitom da kaba weng kam shi syndon ïa utei u Asst. Sports Director uba la nud ban leh ïa kitei ki kam bad u bym tip shuh ïa ka akor ka burom.”
“Ngi da kyntu jur ruh ïa ka NEHU ba ka dei ban shim da kaba tyngeh khnang ba kum kine ki jingjia kim dei shuh ban wan jia hadien habud,” la bynrap u Bah Hamletson.
