Khliehriat, Naiwieng 20
Ka 12 Dalloi FC bad ka Golden Lion ki la ïasam ar shi point ha ka lympung ïalehkai ‘1st Open to All Veteran Football Tournament’, katba ka EJHTOTA ka la jop da ka ‘walk over’ hadien ba ka Khliehriat East ka khlem lah ban wan mih madan.
Ïa kane ka jingïalehkai ba la pynïaid da ka East Jaiñtia Hills District Football Association (EJHDFA) la pynlong ha madan Artificial Turf Diengshynrum, Khliehriat ha ka Lah Sngi U Blei.
Ha ka jingïakhun kaba nyngkong ka 12 Dalloi FC bad ka Golden Lion ki la ïakhaid mar 1-1 kol. Ïa ka kol jong ka 12 Dalloi la thep da u Golden Mukhim ha ka minit kaba 39, katba ïa ka kol jong ka Golden Lion la thep da u Dangaishuh Rymbai ha ka minit kaba 58.
