New Delhi, Naiwieng:
ki bor pyniaid ka Egypt ki la pyntip ba la ioh pdiang ia ki song jingiarap ba la phah da ka India naka bynta ki paidbah nong Palestine kiba shong ha Gaza Strip bad ka la pynpoi sha Egypt bad ka ban sa phah pat sha Gaza naka bynta ban sam sha kitei ki paid nongshong shnong ka Gaza kiba la mad ia ka jingkyrduh bam bad ki jingeh kiba bun naduh ba sdang ka thma Israel bad ki lehnoh Hamas.
Ia kitei ki lad jingiarap la aiti sha ka Egyptian Red Crescent bad ka Egypt kan sa leh ia kaba donkam ban pynpoi pat sha Gaza.
U Lamphang ka tnat kam bar ri, u Arindam Bagchi ha ka Sngi U Blei u la pynbna hapoh ka Twitter ‘X’ ba ka song jingiarap kaba 2 naka bynta ki paidbah ka Palestine ka la wan poi ha Egypt ha katei ka step bad ia kitei ki jingiarap la aiti sha ka tnat Egyptian Red Crescent bad katei ka tnat kan sa leh ia kaba donkam baroh haduh ban da poi sha Palestine.
La ong ba ka liengsuiñ Indian Air Force (IAF) C17 kaba kit ia 32 Ton ki mar bam naka bynta ki paidbah nongshong shnong ka Gaza, ka la leit poi sha ka Kad Liengsuiñ El-Arish jong ka Egypt ha ka step Sngi U Blei.
Ha ka sien ba nyngkong, ka India ka la phah kumba 38 Ton ki mar bam sha ki paidbah ka Gaza ha kaba la leh hi kumjuh ka rukom kumba la phah sha Egypt ha kane ka sien.
Napdeng baroh kitei ki jingiarap ba la phah da ka India, la kynthup ruh naduh ki dawai- ki dashin, ki dara ban ker iing, ki sleeping bag bad kiwei- kiwei de ki jingdonkam ba ki paidbah ka Palestine ki lah ban pyndonkam man la ka sngi.
La ong ruh ba ka India ka kwah ban leh kham bha naka bynta ki paidbah nongshong shnong ka Gaza bad ka India ka la ialeh ruh ban thaw lad kumno ban ai jingiarap ia kitei ki paidbah bad ban iada ruh na ki jingma jong ka thma hapdeng ki lehnoh Hamas bad ka Israel kaba la sdang naduh ka 7 tarik jong u Risaw bad kaba dang iai bteng haduh kine ki sngi ba mynta.
