Shillong, Naiwieng 20
Ka Pay For Right Foot-ball Academy ka la rah ïa ka nam lahduh ha ka lympung ïalehkai SRGT 3rd Division Football League 2023 ba la pynïaid da ka Shillong Sports Associa-tion.
Kane ka nam jop ka la wan hadien ba ka la lah ban pynliem noh ïa ka Mylliem Lum SC da 2-0 kol ha ka jingïakhun final kaba la long ha ka Sngi U Blei ha SSA Stadium, Polo.
Ha kane ka jingïakhun baroh arliang kynhun ki la pyrshang ban ïakhun tyngeh naduh kaba sdang ha kaba kim shym la lah ban thep kol haduh kaba kut jong ka kylla step.
Hadien katto katne ba la bteng ïa ka jingïakhun jong ka kylla miet ba ka PFR ka la ïoh ban pynkhihjar nyngkong eh lyngba u Robi Maring ha ka minit kaba 62. Hadien phra minit kane ka kynhun ka la pynbud biang ïa ka kol kaba ar lyngba u Andy Suting na ka bynta ban tam da 2-0 kol.
Watla ki rangïalehkai ka Mylliem Lum ki la pyrshang ban ïakhun tyngeh na ka bynta ban pynphai, hynrei ha kaba kut ka jingïalehkai kim shym la lah ban pynurlong bad mad ïa ka jingshah rem.
Ïa ki khusnam ha kane ka sngi la sam da u President ka Meghalaya Football Association u Bah Hamletson Dohling ha kaba la ïadon lang ki dkhot ka SSA.
Ka PFR bad ka Mylliem Lum ki la kiew kyrdan mynta sha ka Second Division ha kaba kin ïoh ban ïashim bynta ha u snem ban wan.
