Shillong, Naiwieng 20
U Arsene Wenger, uba long u khlieh jong ka Global Football Development, FIFA bad uba long ruh u coach ba paw, u la wan poi hapoh ri India ha ka Lah Sngi U Blei bad u la ïoh ban ïakren bad ki khlieh jong ki katto katne ki shlem ai jinghikai phutbol kiba don ha kylleng jong ka ri.
Ka jingïaphylliew jingmut u Wenger ka la long kaba seisoh bad u President ka AIFF u Kalyan Chau-bey lem bad u Acting Secretary General u Satyanarayan M na ka bynta ban plie seng ïa ka AIFF-FIFA Academy bad ruh ban kyntiew ïa ka jingïalehkai phutbol (youth development) hapoh ri India.
Ha kane ka jingwan jurip kaba lai sngi, u Wenger lem bad ka kynhun jong ka FIFA Talent Development Scheme kin ïadon ruh ha ka jingplie ïa ka AIFF-FIFA Academy ka ban sa plie ha Bhubaneswar ha ka sngi Ba-ar. Kane ka dei ka sien kaba nyngkong eh ba u Wenger u la wan sha India.
Haba pdiang burom ïa u Wenger, u President ka AIFF u la ong, “Ngi sngwkmen eh ban pdiang sngewbha ïa u Wenger. Ka long kaba donkam ban ïoh ka jingpynpaw ka jong u namar u long u tbit ha ka jingpynïaid phutbol bad ngi khmih lynti ba un dang ïai bteng ban don bynta ha ka projek Talent Development Scheme jong ka ri.”
“Ngi la ïatai sani bha ha kaba ïadei bad kane ka projek la kumba lai bnai mynta. Ka jingwan u Wenger sha India bad lyngba ka jinglong ba tbit bad ka jingkyrshan na ka FIFA, nga thikna ba kane ka projek kan long kaba jop.”
Ha kaba ïadei bad ka phutbol hapoh ri India, u Chaubey u la ong, “Ngim dei ban kyntiew ïa ka phutbol tang hapoh ri India. Ngi lah ban nangpynïar ïa ka phutbol ha kylleng ka pyrthei.”
Ha kawei pat ka liang u Wenger u la ong, “Nga pynpaw ka jingsngewkmen haba nga poi hapoh ri India. Ka thong ka jong nga ka long ban kyntiew ïa ka phutbol ha kylleng ka pyrthei. Ngam sngew lah ngeit ba ka ri kum ka India kaba don haduh 1.4 billion, ka bym lah ban kyntiew ïa ka phutbol hakhmat ka pyrthei.”
Ha kaba ïadei bad ka jingkiew ka phutbol hapoh ri India, u Wenger u la ong, “Ka long kaba kongsan lada ngi la lah ban tei bha hapoh ri India. Ka thong kaba kongsan eh ka jong nga ka long ba ban pynkohnguh ïa ki briew bad ka don ha ka par ksiar ha kane ka jaka bad haduh mynta ym pat shym la lah ban pynpaw, ban pynpra bad ban pynshlur.”
