C. B. Iawphniaw
Ka shnong Nongnah ka jngai kumba 30k.m. na Mawkyrwat ka Nongbah jong ka District. Ka shnong ka hap ha ka Riwar Sepngi. Ka don ka surok kali (Motorable Road) kaba ïaid lyngba ka shnong naduh Mawkyrwat, Rangthong naduh Ranikor ka Nongnah ka hap hapoh ka Hima Maharam Syiemship. Ka shnong la ker da ki riat ne lyhuh bah la jan baroh ki sawdong pud lait noh tang phang shathie la ker da u Lum ka Iawpaw. Ka long ka shnong ba shong na jrong lum kaba itynnad ba ïa oh shrong phylla da ka Mei Mariang.
Hapoh ki them bad ki lyhuh jong ka ki don ki khlaw ba rben. Ka lyer pyngngad ka beh hir hir khlem sangeh na ki them bad ki lyhuh jong ka. La tip ïa ka shnong kum ka Tableland. Ha syndah jong ka u ïeng u Lum ka Iawpaw uba ker kum ka kynroh bah naphang shathie ka ri Bangladesh. Ha ki jaka madan jong ka shnong la tap da ki phlang kiba itynnad ka jingpaw ki lum ki wah jong ka (Scenery). Ka Nongnah kan sa dei kawei ka jaka jngoh kai pyrthei lada lah ban kham pynitynnad shuh shuh ïa ka.
Ka krem Mawtynhiang bad ka pung sum shrieh ki khring ïa ki nongjngoh kai. Ka pung sum shrieh ka long kum ka pung sum (swimming pool) Natural. Ha kane ka shnong ki don de ki kshaid ba noh rymphum ha ka por lyiur. Kum ka kshaid phot syntih, kshaid phot synrang, kshaid kyrsuh thad bad kshaid Urkhurai.Kine ki kshaid ki kham itynnad ha ka por lyiur ba ai um da ki wah duid kiba rit. Ka Nongnah ka long ka shnong kaba paw bha ha ka jingbang u sohniamtra ha ki por mynshuwa.
Katba mynta ka la duh ïa ka nam na ka daw ba la ïap tram lut ki diengsoh na ka jingkylla ka mariang. Ka Nongnah ka kynthup phra tylli ki kyntoit shnong. Ka Mawtajem, ka Nongnah, Ka Nongktieh,Ka Domsohkhai, Ka Nongkdait nongdom, Ka Nongkdait Nongtwah. Ka Thangrai bad ka Mawhyndeng. Ka kyntoit Thangrai ka dei ka Shnong kaba la shah wiang ding ha u phareng ha ka por ba ka Nongnah ka ïeng pyrshah ïa u phareng ban ïa khun thma. Kane ka long ka jing-ïathuh khana lyngkot shaphang ka Nongnah.
