Khan Yunis, Naiwieng:
U heh ka tnat ka koit ka khiah jong ka Hamas hapoh Gaza, ha ka Sngi U Blei u la iathuh ba ki bor pyniaid ki la hap ban pynkynriah noh ia 31 ngut ki khyllung ba kha khlem dap bnai na ka hospital Al-Shifa namar ka jingma kaba ap ia ki paidbah kiba don ha katei ka jaka sumar kaba long kawei na ki jaka ba ka Israel ka la phai khmat bad buh shun bha ha kine ki sngi.
U Mohmmed Zaqut, u Director General jong ki hospital hapoh Gaza, u la iathuh ba namar ka jingbym shngaiñ jong katei ka hospital ha kine ki sngi, kumta la pynkynriah noh ia kitei ki 31 ngut ki khyllung ba la kha khlem dap bnai sha kiwei pat ki jaka ban shu pynthiah shipor katba dang iohlad ban sumar katba kot ka bor. Ia kitei ki khyllung yn hap ban khmih da 3 ngut ki doktor bad tang 2 ngut ki nos.
Kane ka jing pynkynriah ia kitei ki khyllung ha katei ka sngi, ka long ruh hadien shi sngi ba da ki spah ngut ki paidbah ki la phet noh na katei ka hospital namar ka jing bym shngaiñ jong katei ka hospital kaba la shah kerkut da ki tup-ki man bad ki shipai jong ka Israel.
Ha katei ka sngi la iohi ruh ia ki nongpang kiba leit thiah pang ha katei ka hospital, kiba la pyrshang ban phet lang noh na katei ka jaka hadien ba kim sngew don jingshngaiñ shuh bad ki la rai ban shu leit thiah noh sha kiwei pat ki jaka kiba dang kham shngaiñ ban ia katei ka jaka.
Katba, ki don ruh shibun ngut ki bym shym la lah ban phet ne mih noh na katei ka hospital namar ki dei kiba thiah hapoh ki ICU.
Ka World Health Organization (WHO) ha ka Sngi Saitjaiñ ka la pyntip ba ka la wan jurip sha katei ka hospital Al-Shifa da ka jingsyier ban peit thuh ia ka jinglong- jingman ha katei ka jaka kumba la iohi ia ka jingkynnoh jong ki shipai ka Israel jan man la ka sngi ba la lap ia ka jing buhrieh tiar ki lehnoh Hamas hapoh jong katei ka jaka.
Ka WHO ka la khot ruh ia katei ka hospital da ka ‘Death Zone’ kaba mut ka jaka bym don jingim bad kumta ruh la ong ba ka WHO ka dang pynkhreh ban ioh pynkynriah kyrkieh noh ia ki nongpang bad ki khyllung baroh kiba don ha katei ka jaka khnang ba kin ym shah ktah ha katei ka jingleit khynra jong ki shipai ka Israel.
Ka WHO ka la pyntip ba ha katei ka sngi ka jingleit jurip jongka, ki don kumba 291 ngut ki nongthiah pang bad 25 ngut ki nongtrei ha katei ka hospital.
