Shillong, Naiwieng 20
Shi taïew shwa ka jing-rakhe ïa ka Seng Kut Snem, ka Seng Khasi Kmie lyngba ka Rongbiria Committee ka ju pynlong ïa ka Rongbiria kaba la long ha madan Second Ground jong ka SRGT, Polo.
Ha kane ka jingïakob, ki Rangbiria na kylleng ki dong ki shnong jong ka sor bad khap sor ki la poi ban ïashim bynta shit rhem sha kane ka jingïa-kob. Ha shwa ban sdang ïa ka Rongbiria, la ïoh ïa ka jingkyntiew ïa ka lama jong ka Seng Khasi da u Rgh O. Pyngrope, ba long u Acting President jong ka Seng Khasi Kmie, hadien kane, la ïoh pat sa ïa ka nguh ka dem kaba la pyndep da u Rgh Skor Jala, Chairman ki Riewtym-men Riewsan ka Seng Khasi Kmie.
Hadien ka nguh ka dem, la ïoh pat ïa ki jingkren ba lyngkot na u u Rgh O. Pyngrope bad kumjuh na u Rgh Hainess Marbaniang General Secretary Seng Khasi Kmie. Hadien kane, la khreh pat ban sdang ïa ka Rongbiria.
Ha ka por janmiet, u kongsan u ba la wan ban ïa skahi lang ïa kane ka jingïakob dei u Chief Executive Member ka Khasi Hills Autonomous District Council u Bah Pynïaid Singh Syiem, ha kaba la synran lang ïa u da ki kato katne ki Rangbah ba dei artad ki dkhot ka jylli pyrkhat kam ka Seng Khasi Kmie.
Haba kren kum u kongsan, na ka liang u Bah Pynïaid Singh Syiem u pynpaw ba u da sngew-kmen shi katdei eh ïa u shimet bad ïa ka ophis jong ka KHADC ban ïoh ban ïashim bynta lang ha kum kane ka lympung, ha kaba ka Rongbiria ka dei kaba la hikai da ki longshwa ki manshwa bad kane ka ïai im namar ba ka Seng Khasi ka dang don ba kan pynim ïa kane ka bynta.
U Bah Pynïaid u da sngewkmen ba un ïoh ba un ïadon lang , khamtam ba da kumno ban don ïa ka jingïadei kaba ïajan na ka liang jong ka District Council bad ka Seng Khasi, ha kaba ïadei bad kiba bun ki kam kiba donkam ban ïa trei lang na ka bynta ban pynneh pynsah ïa ki riti ki dustur kiba u longshwa man shwa u la hikai.
Da kumta u Bah Pynïaid u ong ba kane ka dei kawei ka bynta kaba yn shim khia da ka District Council ïa kaba yn ïa trei lang ym tang mynta lehse wat man la ka snem ha kaba yn ïadon bynta ban lah ban pynïaid beit ïa ka rongbiria wat ha kiwei kiwei ki jaka jong ka ri lum Khasi.
U Bah Pynïaid u la ong ruh ba ka Rongbiria kam da dei eh tang ka jingïashim bynta ha ka jingïasiat khnam, pynban kaba long shi bynta ha ka kren ka khana ka dwai ka phirat, ïa kaba ka pynurlong ïa kane ka kam.
Haba phai sha ki jingïakob, ha ka ïakob siat kaba para marwei, u lahduh ne nam tam ha kane ka kynti kaba mynta dei u Teibor Warbah na Laitkyrhong, ba wan ba-ar dei u Bok L. Marshillong na Mawpat bad uba wan ba-lai dei u Hed Nong-rum na Deingsong.
Haba phai pat sha ka ïakob siat kynhun, lahduh dei ki shi jur na Wahum-lawbah ba la mihkhmat da u Diwan Kharshiing bad u Training Sawkmie, ka kynhun kaba wan ba-ar dei ka Umkdait A ba la mih-khmat da u Olik Jyrwa bad u Wudshed Kharshiing.
Katba ka kynhun kaba wan ba-lai dei ki ar kynhun ba la shah rem noh ha ka por ba la ïakhun ïa ka semifinal bad kine ki long Seng Khasi Nongmadan ba la mihkhmat da u Shemborlang Sawkmie bad u Diwansing Rani bad ka kynhun ka Malki ‘A’ ba la mihkhmat da u B. Kharmawphlang bad u Deiborlang Nongsteng.
Ïa ki khusnam la ïarap ban sam lang da u Rgh Rangpher Rynjah, u Rgh P.D Nongrum lem bad u kongsan u bah Pynïaid Singh Syiem.
Ïa ka jingïakob baroh kawei la pynkut da ka jingpynhiar ïa ka lama ka Seng da u Rgh Wallam-phang Roy Vice Presdient Seng Khasi Kmie bad Chairman ka Rongbiria Committee.
