Seoul, Naiwieng:
Ka tnat shipai jong ka South Korea ka la maham pyrshah ia ka North Korea ha ka Sngi Nyngkong ba dei ban pynsangeh noh mardor ia ka jingpynkhreh ban leit buh ia ki ‘Spy Satellite’ ha kane ka por bad la maham tyngeh ruh ba lada ka North Korea kan iaid shakhmat ia ktei ka jingthmu, ka South Korea kan nym aili bad kan leh ia kaba donkam.
Namar kumba la iohi ba ka North Korea ha kine ki sngi, ka dang pynkhreh ia ka jingleit buh ia utei u kor ‘Spy Satellite’ uba 3 hadien ba la dep ban pyrshang la 2 sien hynrei ka jingpyrshang ka long kaba pulom.
Ha ki khyndiat por ba la leit, ka tnat syntiat na Seoul ka la pyntip ba ka North Korea ka la dang pynkhreh bad ka la jan poi sha ka thong ban ioh ban pynher bad leit buh noh ia utei u kor Satellite ha ka sien kaba 3 hadien ba katei ka jingthmu jong ka ri ka la pulom khlem jingsei soh.
Kumta ruh u Myntri ka tnat iada jong ka South Korea ha ka Sngi U Blei u al ong ba ka jingthmu jong ka North Korea ban leh ia katei ka kam ka lah ban long ha kane hi ka taiew.
Namarkata, ka South Korea ka la maham tyngeh ia ka North Korea ba ka dei ban sangeh noh ia katei ka jingthmu bad ka jingpynkhreh jongka.
