Shillong, Naiwieng 20
Ka Siliguri United FC kan wan mih bujli ha ka jaka jong ka Barak FC kaba na Nagaland na ka bynta ban ïashim bynta ha ka lympung ïalehkai Football Invitation Tournament 2023-24 ba la pynïaid da ka Mawlangwir Sport Club.
Ïa kane la pyntip da kane ka synjuk ba namar ki daw bym lah kiar, ka Barak kan ym lah shuh ban wan ïashim bynta ha ka lympung. Te kumta ka Siliguri kan ïakhun pyrshah ïa ka Golden Lion ha ka sngi Balang (22 tarik) ha ka por 1 baje noh phai sngi ha Rowell Lyngdoh Stadium Mawlangwir.
Ka Mawlangwir Sport Club ka la pyntip ruh sha ki paidbah riew ïeit phutbol ba ïa ka dor bai tiket la pynhiar noh na ka T.150 sha ka T.100 tyngka marwei.
