Shillong, Naiwieng 21
Ka kynhun ïalehkai phutbol ka India ka la mad ïa ka jingshah rem ha ka Qatar da 3-0 kol ha ka wat kaba ar jong ka lympung ïaknieh jong ka FIFA World Cup 2026 bad ka AFC Asian Cup Saudi Arabia 2027, ha ka sngi Ba-ar ha Kalinga Stadium.
Watla dangshen ka la lah ban pynliem ïa ka Kuwait da 1-0 kol, pynban ka India ha kane ka jingïakhun ka la shem jingeh ban ïakhun pyrshah ïa ka Qatar kaba la ïoh ban ïashim bynta ha ka FIFA World Cup ba la dep.
Tang mar ïasdang ka jingïakhun ka Qatar ka la ïoh ban pynkhih jar nyngkong eh lyngba u Mustafa Meshaal ha ka minit kaba 4. Watla ka India ka la pyrshang ban pynphai, hynrei kam shym la lah ban pynurlong haduh kaba kut jong ka kylla step.
Ka Qatar ka la ïoh biang ban thep ïa ka kol kaba ar lyngba u Almoez Ali ha ka minit kaba 47. Hashwa ban kut ka jingïalehkai ka Qatar ka la thep biang sa shi kol lyngba u Yusuf Abdurisag ha ka minit kaba 86 na ka bynta ban khur syndon ïa ka jingjop.
