Shillong, Naiwieng 21
Ka Hynñiewtrep National Youth Front (HNYF) West Khasi Hills District ha ryngkat ka jingsynranlang jong ka HNYF Sengkmie, ha ka 21 tarik u Naiwieng 2023 ka la leit ban ïakynduh bad ai da ka jingujor sha u Myntri ka tnad ba dei khmih ïa ka pule ka puthi jong ka sorkar jylla, u Rakkam A Sangma pyrshah ïa uwei u kontraktor uba pyntrei ïa ka skul Sib Sing Memorial Higher Secondary School, Nongstoiñ halor ka jingbymhun ïa ka rukom trei bad halor ka jingpynslem jong utei u kontraktor ban aiti ïa katei building ba la dep shna sha ki bor pynïaid jong ka skul.
Lyngba ka dorkhas ba la aiti da ka HNYF sha utei u Myntri, ka seng ka la kam ba ha ka jingleit jurip dang shen ïa ka building bathymmai jong kane ka skul, la lap ba katei ka skul kam don ïa ka blackboard, ki jaka shong, ka bording, ka um, ki jingkhangïit, ka phyllaw skul bad shibun kiwei ki jingdonkam jong ka skul.
Shuh shuh la lap ruh ba katei ka skul kam don ïa ka kynroh kaba long pynban kumba ailad ïa ki kam sniew ban kharoi hapoh katei ka ïingskul bad nalor kata, ka seng ka la kynnoh ruh ba ïa ka madan ym shym la siang da ka dewbilat bad kane kan buh jingeh ïa ki khynnah skul khamtam ha ka por slap.
Haba kren sha ki lad pathai khubor, na ka liang u Joint Secretary ka HNYF WKHD, u Bah Phaskal Nongrum, u la ong ba ka jingsahkut jong katei ka building ka la pynlong ïa ka seng bad ki nongpynïaid ka skul ba kin dap da ka jinglyngngoh namar naduh ka 17 tarik u bnai Kyllalyngkot 2023, la ïohi ba u Myntri Rangbah ka jylla, u Conrad K Sangma u la wan ban plie ïa katei ka ïingmala bathymmai jong katei ka skul.
“Kaba lyngngoh ka long ba haba la wan ban plie ïa katei ka building thymmai, ha ka jingshisha ka la dei ban biang lut nadong shadong hynrei haba ngi peit mynta ha kane ka building ki duna nadong shadong”, la ong u Bah Nongrum.
U Bah Nongrum u la ïathuh ruh ba ha ka jingïoh ban ïakynduh ïa ki nonghikai jong katei ka skul ki la pynpaw ba ki shem jingeh shikatdei eh na ka daw ba kim ïoh shuh ban pynlong klas ha ki kamra bathymmai jong katei ka skul.
Na ka liang u Myntri ka tnad pule puthi u la ai ka jingkular ïa ka seng ba un sa peit kham bniah bad buddien halor katei ka bynta.
Shuh shuh na ka liang ka seng kan nym shong kli-kti bad kan dang ïai ïaleh na ka por sha ka por ban buddien ha kaba ïadei bad katei ka skul Sib Sing Memorial Higher Secondary School.
“Ngi khmih lynti ba nangne shakhmat ba na ka liang jong ka sorkar ba kan pyndep kloi khnang ba ka jingeh jong ki paidbah ka thaiñ West ha kaba ïadei bad katei ka skul bad ha kaba ïadei bad ki khynnah pule bad ki nonghikai ba kin ïoh ban pynlong skul noh hapoh katei ka jaka”, la ong u Bah Nongrum.
Na ka liang u Bah Orester Mawlong uba dei u dkhot ka HNYF Sengkmie, u la ong ba ka pule ka puthi hapoh kane ka jylla ka la hiar lypa bad ym ïohi ba kan kiew la ka long ha ki thaiñ nongkyndong ne wat ha sor ruh kumjuh.
“Ngi ïohi ba ka pule ka puthi mynta hi ki la shu ïaleh politik beit, ngi na ka liang ka seng ngim sngewtynnad ïa kane”, la ong u Bah Mawlong.
U Bah Mawlong u la ong ba na ka liang jong ka sengkmie ruh kan ïai buddien halor katei ka kam khnang ba ka kam kan ïaid shakhmat bad ha kaba ïai dei bad ka pule ka puthi hapoh ka jylla.
