New Delhi, Naiwieng:
Ka kynhun National Investigation Agency (NIA) ka la buh da ka jingmudui pyrshah ïa u Gurpatwant Singh Pannun kum u briew uba la don kyrteng ha ka thup ban shah ñiew kum lehnoh halor ka jingsaphriang ka Video kaba u la pyllait ba u la byrngem ïa ki nongleit jingleit kiba shong ha ka Air India bad kumjuh u la ong ruh ba ki lynti suiñ ha ka pyrthei baroh kin sa shah pakhang bad yn sa khang ruh ïa ka jingtreikam jong ki liengsuiñ naduh ka 19 tarik, Naiwieng, la ïathuh ka kynhun tohkit ha ka lah sngi U Blei.
Ka kynhun NIA ka la pynngat ïa u Pannun halor kiba bun ki kyndon jong ka Indian Penal Code and Unlawful Activities (Prevention) Act, 1967.
U Pannun, uba la pynbna dalade ba u la dei u General Counsel’ jong ka kynhun ba la shah ñiew beaiñ ka ‘Unlawful Association’, Sikhs for Justice (SFJ), u la shah buddien bad shah khmih bniah biang hadien ka jingpyllait jong u ïa katei ka Video kaba la saphriang ha baroh ki lad phah khubor ha kaba u la kyntu ïa ki Sikh ba kim dei ban leit jingleit da ki liengsuiñ Air India bad hadien ka 19 tarik, Naiwieng u la byrngem ba kin sa shah pynïap lada ki shong ha ki liengsuiñ Air India.
U Pannun u la byrngem ruh ïa ka Air India ba kan ym ïoh jingbit na ka bynta ban treikam ha pyrthei.
Na kane ka jingdon jong kane ka khubor byrngem jong u Pannun ka la don ka jingpyntreikam ban wanrah ïa ka jinglong adkar bad kumjuh ban phah tohkit halor kane da ki kynhun ïada kiba don ha Canada, India bad ha kiwei pat ki ri ha kaba ki liengsuiñ Air India ki ju treikam.
