Gaza, Naiwieng:
Katkum ki khubor la ong ba Israel khlem da pynsngap ia ka jingkyntu jong ki tnat bad ki ri bapher bapher hynrei ka la bteng ban iai phah ia ki shipai jong ka ban leit hiar thma bad khynra ha man ki dong ki kyntoit hapoh Gaza. Katba ki nongialam ka Qatar pat ki la pyntip ba ka jingïakren ïasuk hapdeng ka Hamas bad ka Israel ban pyllait noh ia ki 240 ngut ba la ioh rahbor ka la nang jan.
Ka Israel naduh ka Sngi U Blei ruh ka la maham bad bthah ia ki paidbah nongshong shnong ka Gaza kiba shong ha ki thaiñ ba don ki phetwir hapoh Jabalia bad kumjuh ruh na ki thaiñ ba marjan ba ki dei ban mih noh na kitei ki jaka katba ki shipai ka Israel ki dang pynkhreh ban pynjur ia ka jingthombor bad ban leit khynra ruh ia ki kyndong- kynshrot ba don ki ktem lehnoh Hamas.
Hadien kata, ka Israel ka la ther bom sha kitei ki jaka ba don ki phetwir bad ki lad pathai khubor kiba don hapoh Gaza, ki la pynsaphriang ia ki dur ha kaba la iohi ia ka tdem kaba khlaiñ bad kaba jur bha kaba kiew shalor suiñ na kitei ki thaiñ hadien ka jingther bom jong ka Israel sha katei ka bynta.
Kumjuh ruh u heh ka koit- ka khiah jong ka Hamas hapoh Gaza, u la iathuh ba ki don kumba 80 ngut kiba la khlad na 2 tylli ki jingther bom jong ka Israel hapoh Jabalia ha ka Sngi Saitjaiñ, kynthup ia kito kiba don ha ki jaka bad ki skul kiba hap hapoh ka jingkhmih jong ka United Nations bad kiba la buh khnang ban long kum ki jaka rieh tngen ba shipor naka bynta ki paidbah nongshong shnong kiba la shu kylla phetwir ha kane ka thma.
Hynrei ka tnat shipai ka Israel ka la dep maham lypa bad ka la pyntip ruh ba ka Jabalia ka long kawei na ki bynta ba ka Israel ka phai khmat bha namar ki don bun ki ktem lehnoh bad ki dei ruh ki jaka ba ka Israel ka ther bom naphang namar ka tip ba ki lehnoh Hamas ki bun ha kitei ki bynta.
U heh ka United Nations, u Volker Turk ha ka Sngi U Blei u la pynrem jur halor katei ka jingther bom jong ka Israel khamtam sha ki bynta ba don ka skul ba la hap hapoh ka jingkhmih jong ka UN ban long ka jaka shong ba shipor ia ki paidbah ka Gaza.
