Shillong, Naiwieng 21
Ka Shillong Lajong FC ka la khmih lynti ban bteng biang ïa ka jingjop ha ka lympung ïalehkai I-League naba kan hap ban ïakhun pyrshah ïa ka Delhi FC ha ka sngi Balang ha SSA Stadium, Shillong.
Dangshen ha ka jing-ïalehkai ba la dep ka Lajong ka la lah ban khur ïa ka jingjop kaba nyngkong eh ha la ïing hadien ba ka la lah ban pynliem ïa ka Gokulam Kerala da 3-1 kol. Te kumta kane ka kynhun hapoh ka jingïa -lam u Bah Bobby L. Nong -bet ka la khmih lynti ban ïalehkai bha na ka bynta ban khur ïa ki lai point.
U coach ka Shillong Lajong u Bah Bobby Nongbet u la pynpaw ïa ka jingthrang ban sdang noh ïa kane ka jingïakhun hadien ba ka kynhun jong u ka la jop ïa ka Gokulam. “Watla ngi la jop ïa ka Gokulam, hynrei ngim dei ban kheiñ sting ïa ka Delhi FC namar ka la jop ïa ka Aizawl FC ha ka jingïalehkai shabar na la ïing. Kane ka kynhun liang pyrshah ka don ïa ki rangïalehkai kiba tbit.”
Ha kawei pat ka liang u coach ka Delhi FC u Yan Law u la pynpaw ba ka kynhun jong u ka donkam ban ïalehkai bha lada ka kwah ban khur ïa ki lai point na ka Lajong, kaba long ka kynhun ka bym pat shah rem bad kaba don ïa ki nongkyrshan ha kane ka jingialehkai ha la ïing.
Kumba ka long mynta ka Lajong ka la kamai 6 point ha kaba ka la don ha ka kyrdan ba hynriew, kata hadien ïa ka Delhi (7 point) kaba la don ha ka kyrdan basaw.
