Shillong, Naiwieng 21
Ka kynhun ki nongsiat khnam ka Jylla kiba don hapoh ka synjuk jong ka Archery Association of Meghalaya (AAM) kin pynkhreh ban leit ïashim bynta ha ka jingïakob siat khnam ba la tip kum ka 30th NTPC Senior Indian Round, 43rd NTPC Senior Recurve and 19th NTPC Senior Compound National (M&W) Archery Championship.
Kane ka jingïakob kan sdang naduh 24 haduh 30 tarik mynta u bnai ha Ayodhya kaba ha Uttar Pradesh.
Hashwa ba kane ka kynhun kan mih na kane ka nongbah ban leit ïashim bynta sha katei ka lympung, na ka liang katei ka synjuk siat khnam ka Jylla ka la long ba la pynkhreh bha hadien ba ka la dep ban jied ïa ki nongïalehkai kiba kynsai bad ruh ban ai jinghikai pura ïa ki.
Ha ka Indian Round yn ïashim bynta tang saw ngut ki rangïalehkai kata u Manchua Pyrbot. Marshall Parïong, Kitboklang Pasi bad u Kirdhart Gurung.
Ha ka Compound yn mihkhmat da saw ki shynrang bad lai ki kynthei. Kine ki long u Leonaldo Lyngdoh, Akash Thapa, Sumit Kumar Choudhury bad u Ram Bahadur Thapa. Katba ha ka liang ki kynthei ki long ka Nakibansharai Khonghat, Kate Diamon Lyngdoh bad ka Adorable Wanñiang.
Katba ha ka Recurve yn ïashim bynta mar saw ngut ki nongïalehkai ha ka liang ki shynrang bad kynthei. Ha ka liang ki shynrang ki long u Amebalaker Wanñiang, Vivek Sumar, Devraj Mohapatra bad u Hypormi Wanñiang. Katba ha ka liang ki kynthei ki king ka Navidisha Kokil Lapoor, Damanda-shisha Pasi, Daphishisha Jamu bad ka Andrica Nongsiej.
Ïa kane ka kynhun yn ïalam da ka Kong Bansara Dhar kaba long ka coach archery jong ka tnat ïalehkai ka Sorkar Jylla, kumjuh u Jag Parasad Thapa, Besuta Vero bad u Ashok Biswa.
Na ka liang u Assistant Director ka tnat ïalehkai jong ka Sorkar Jylla u Bah Paia B. War Nongbri u la ai khublei kitbok kitriang ïa kane ka kynhun ba kan ïalehkai bha ha katei ka lympung bad la khmih lynti ba kin khur ïa ka jingjop.
Kane ka kynhun kan mih na ka nongbah ha ka sngi Balang bad la khmih lynti ba kitei ki nongïalehkai kin lah ha ka ban ïalehkai bha na ka bynta ban kynjoh sha ka thong.
