Shillong, Naiwieng 21
Ka Sohïong SC ka la khur ïa ka jingjop ha ka SSA 2nd Division Football League 2023 hadien ba pynliem ïa ka Marbisu SC da 3-2 kol ha ka sngi Ba-ar ha madan Third Ground, Polo bad kane la wan urlong lyngba u Sharningstar Jana hashwa ban kut ka jingïalehkai.
Ha kane ka jingïakhun ka Marbisu ka la pynkhih jar nyngkong eh lyngba u Arnest Karphuli ha ka minit kaba 9, hynrei hadien 7 minit ka Sohïong ka la lah ban pynphai kylla lyngba u Keystar Malngiang. Kane ka kynhun ka la pynbud biang ïa ka kol kaba ar lyngba u Arbun Sing Warjri ha ka minit kaba 29 na ka bynta ban tam da 2-1 kol ha ka kylla step.
Hadien katto katne por ba la bteng biang ïa ka jingïalehkai jong ka kylla miet, ka Marbisu ka la ïoh ban thep ia ka kol kaba ar ha ka minit kaba 75 lyngba u Paul Nongdhar na ka bynta ban ïakhaid mar 2-2 kol. Hashwa ban wai ka Sohïong ka la ïoh ban thep ïa ka kol kaba lai lyngba u Sharningstar Jana ha ka minit kaba 90+5 na ka bynta ban khur syndon ïa ka jingjop.
Haba phai sha ka jingïakhun kaba ar hapdeng ka Imson FC bad ka Smit SC ki la ïasam mar shi point hadien ba ki la ïakhaid mar 1-1 kol. Ka Smit ka la pynkhih jar nyngkong eh lyngba u Kalvest Pathaw ha ka minit kaba 8, hynrei ka Imson ka la pynphai kylla lyngba u Kitboklang Rynjah ha ka minit kaba 17.
