Jaipur, Naiwieng:
Ka seng Congress ka la pyllait ïa ka thup treikam na ka bynta ka ilekshon Assembly ha Rajasthan hynnin ka sngi.
U President jong ka seng Congress u Mallikarjun Kharge, u nongkhmih bad u nongpynïaid jong ka seng ha Rajasthan u Sukhjinder Singh Randhawa, u Myntri Rangbah ka jylla u Ashok Gehlot, u President jong ka seng ha ka jylla u Govind Singh Dotasra, u Chairman jong ka kynhun ba dei khmih ïa ki mat treikam jong ka seng u CP Joshi bad u Symbud Myntri Rangbah barim u Sachin Pilot ki la pyllait ïa ka thup treikam ba la tip kum ka ‘Jan Ghoshna Patra’ ha ka shlem treikam jong ka seng ha ka jylla.
U Gehlot u la dep ban pynbna lypa ïa ki 7 tylli ki jingkular sha ki briew jong ka Rajasthan lada jia ba ka seng Congress ka shahjied bad wan ha ka bor synshar.
Ka seng Congress ka la kular ruh ban wanrah bad pyntreikam ïa ka skhim kaba thymmai na ka bynta ka jingthungkam ha ka Panchayat bad ka jingwad khana samari halor ka jingdon jong ki kynhun jait bynriew ha ka mat treikam jong ka ilekshon ha Rajasthan.
Ki 7 tylli ki jingkular ba la buh ki kynthup, ïa ka jingsiew pisa kaba T. 10,000 man u snem sha ki longkmie kiba dei ki khlieh jong ka longïing.
Ki LPG Cylinder na ka bynta T. 500 sha ki 1.05 klur tylli ki longïing. Ka jingthied ïa ka sboh eit masi na ki nongri masi ha ka dor T. 2 shi kilo. Ka aiñ na ka bynta ka Pension Scheme na ka bynta ki nongtrei sorkar. Ban ai da ki Laptop ne ki Tablet sha ki khynnah kiba pule ha ki kolej jong ka sorkar.
Ka Insurance kaba long T. 15 lak na ka bynta kawei ka longïing kum ka jingnoh synñiang na ka bynta ka jingduh jong ki ïa ka jingim ha kino-kino ki jingjia ba wan jia na ki jingthombor jong ki bor ka mariang bad ka jingpynïoh ïa ka jingai jinghikai sha ki khun jong ki ha ki skul English Medium.
Ka seng BJP ruh ka la dep ban pyllait ïa ki mat treikam jong ka na ka bynta ka ilekshon. Ka ilekshon Assembly ha Rajasthan kan sa long ha ka 25 tarik, Naiwieng bad ka jingñiew ïa ki vote kan sa long ha ka 3 tarik, Nohprah.
