Jerusalem, Naiwieng:
Ka tnat shipai Israel ha ka Sngi U Blei ka la kam ba ki la lap ia ka sabut ba kito kiba la shah rahbor naduh ka 7 tarik u Risaw ba ki lehnoh Hamas ki sdang ban leit hiar thma ia ka Israel, ki don hapoh ka hospital Al-Shifa hynrei kitei ki shipai kim pat lah pat ban shem ia ka jaka ba la set ia ki.
Ha kawei ka video ba la pyllait da ki shipai Israel, la iohi ia uwei u briew uba la shah thep hapoh ka byrni bad uba la wanrah da 4 ngut ki briew kiba don ia ka suloi.
Hynrei ka AFP kam pat lah ban pyntikna ne pynshisha ia katei ka video ba la pyllait da ki shipai ka Israel ban pynshisha ba dei ha katei ka jaka ba don ka hospital Al-Shifa ba la set ia kito kiba shah rahbor naduh ba sdang jong ka thma.
Watla ha katei ka video la iohi ia ka tarik kaba la paw bad ka dei hi katei ka ‘7 tarik u Risaw, 2023’ hynrei kam long pat kaba suk ban pynshisha ne ban shu ngeit khlem da wad bniah thik- pa thik khamtam ha kum kane ka juk ba mynta ba kiei- kiei baroh ki long kiba lah ban shna bad pynwan dur namar ka jingstad jong ki kor- ki bor kane ka juk ba mynta.
Haba iadei bad kane, dei naduh katei ka 7 tarik jong u Risaw hi ba ki lehnoh Hamas ki la sdang ban thombor nyngkong ia ka Israel bad ka Israel ruh ka la ther bom khlem jing isnei bad ka la ther naphang ia kylleng ki dong- ki bynta jong ka Gaza Strip baroh kawei bad wat haduh kine ki sngi ba la mih ka jingpyrshah na kiba bun ki ri bad ki tnat bapher jong ka pyrthei ba ka Israel ka dei ban sangeh noh ia katei ka thma, hynrei la ong ba ka Israel kam shym la pynsngap bad na ka liang jong ka Israel, ka la smai ruh ba kan pynduh- pyndam syndon ia katei ka kynhun lehnoh Hamas bad dei na kane ka daw ba ka Israel ka la rai ban iakhun bad ban hiar thma haduh kaba kut tad haduh ba kan da ioh ia ka jingjop ha kane ka thma.
