Kolkata, Naiwieng:
Ki la don kumba lai ngut ki briew kiba la shahkem ha kaba ïadei bad ka jingdonkti ban pynïap ïa uwei u nongïalam jong ka seng TMC ha ka thaiñ South 24 Parganas distrik jong ka West Bengal, la ïathuh ki pulit ha ka lah sngi U Blei.
Kumba la ïathuh ki lad phah khubor la ong ba u President jong ka seng TMC ha Bamungachi kaba don ha Joynagar jong ka jylla u Saifuddin Laskar (47), u la shah siat ïap hajan ka ïingsah jong u ha ka por ba dang step bha jong ka 13 tarik, Naiwieng.
Ki nongkyrshan jong u Laskar, ha kaba ka kurim jong u ka dei ka Panchayat Pradhan, ki la ïoh ban bat ïa arngut ki runar kiba la donkti ha kane ka kam thombor bad ïoh ban pynïap ïa uwei napdeng jong ki.
Sa uwei pat u la shah pyllait noh bad shahkem ha ki pulit, ki la ïathuh. Ki lai ngut ki briew kiba la shahkem ha ka miet jong ka sngi U Blei ki dei kiba la donkti ha ka kam pynïap briew ha kaba la ïoh jingtip ha kane ka thaiñ ba ki la dei ki nongbud jong ka seng TMC.
Ha kaba ïadei bad kane, ym pat kem ne pynngat ïano ïano ruh ha ki kyndon aiñ ïa kiba la shah kynnoh donkti ha ka kam pynïap briew.
Hadien ka jingjia, u MLA jong ka seng TMC ha ka thaiñ u Biswanath Das u la pynshisha da kaba ong ba kine ki runar ki dei ki nongkyrshan jong ka seng CPI(M) bad ka seng BJP ka donkti na sha lyndet ha kaba ïadei bad ka jingshah pynïap jong u Laskar.
Kumba la sakhi hadien ka jingjia, la ong ba ki la don bun tylli ki ïing kiba la shah pynjulor, shah lute bad shah thang ha ka shnong ba marjan ha Daluakhali.
Ki la don kumba katto katne ngut ki briew kiba la shah ktah jur ha Daluakhali ki la pynshisha da kaba ong ba ki ïing jong ki ki la shah pynjulor bad kiba bun napdeng jong ki ki la shah thombor halor ka jingkynnoh ba ki dei ki briew jong ka seng CPI(M).
Ki la pynshisha shuh shuh da kaba ong ba ki ïing jong ki ki la shah thang da ka ding ha ryngkat ka jingdonlang jong ki pulit bad ki kali pyllip ding ki la shah khang lynti na ka bynta ban leit pyllip ïa ka ding na kine ki ïing kiba la pluh.
Ha kaba ïadei bad kane, ki pulit ki la ong ba kine ki briew kiba la shahkem kin sa shah ïalam hakhmat ka ïingbishar, ha kaba hadien kane kin sa shah tohkit.
