Shillong, Naiwieng 21
Ka Games Technical Conduct Committee (GTCC) ka la shong jingïalang ha ka Lah Sngi U Blei ha Conference Hall jong ka MSOA na ka bynta ka jingpynkhreh ïa ka 5th Meghalaya Games 2024.
Ïa kane ka lympung la thmu ban sdang naduh 15 haduh 20 tarik u Kyllalyngkot jong u snem 2024 ha Tura, West Garo Hills District.
Ïa kane ka jingïalang la pynïaid da u Bah John F. Kharshiing, Working President ka MSOA bad Chairman ka GTCC ha ryngkat ka jingïadon lang u Bah Finely L. Pariat, General Secretary MSOA & Secretary ka GTCC, Bah P.B War Nongbri, Asst Director ka tnat ïalehkai ka Sorkar Jylla, ki dkhot ka MSOA, ki President & Secretary na ki 22 tylli ki synjuk ïalehkai bapher bapher.
Kane ka long ka sien kaba nyngkong eh ba ïa kane ka lympung yn pynlong ha kiwei pat ki district. Kham hashwa ka organising committee jong ka 5th Meghalaya Games ka la pynlong ka jingïakynduh lang ha ka 14 tarik u Naiwieng jong u snem ba la lah (2022) ha ka shlem treikam jong ka tnat ïalehkai kaba ha Polo.
Kumban shu pynkynmaw ba ha ka 4th Meghalaya Games, u Myntri Rangbah ka Jylla u Conrad K. Sangma u la pynbna ba nangne shakhmat ka Meghalaya Games yn pynlong man ka snem bad katba lah yn pynlong lang sha ki District bapher bapher jong ka jylla kum shi bynta ban kyntiew lang ïa ki jaka ïalehkai ha ki District bapher bapher bad u la pynbna ba ka Meghalaya Games kaba hynriew yn pynlong ha Jaiñtia Hills.
Ha shwa kane ka jingialang Ka Orga-nising Committee jong ka Meghalaya Games kaba san (5MG2024) ka la long ha ka 14 tarilk November 2023 ha kamra treikam jong Director, Department of Sports and Youth Affairs Government of Meghalaya ha Secretariat, Shillong.
Ha katei ka jingïalang na ka liang u Bah John u la ong ba kum ki State Sports Associations (SSAs) ki la long kiba la khreh ban pynlong ïa katei ka jingïalehkai ka sien nyngkong sha ki District bad u la kyrpad ïa ka jingïatrei lang jong baroh ki kynhun ban nym khieñ than ïa ki jingduna namar ka thong ka long kumno ban pynshlur ïa ka jingïalehkai sha baroh ki district ba kin mih ruh ki jaka ïalehkai sha ki district sha kyndong. U Bah Kharshiing u la pynkynmaw ïa baroh ki kynhun ba kine ki jingïalehkai baroh ki long shi bynta ban pynkhreh ruh ïa ka XXXIX (39th) National Games kaba ka jylla kan pynlong ha u 2026 lane 2027 hadien ka Uttarakhand bad ka Chhattisgarh bad la kyrmen ba lyngba kine ki jingkyrshan jong ka Sorkar Jylla ha ki prokram bapher bapher bad da kaba pynlong tista ïa kine ki lympung ïalehkai ha ka jylla bad kiwei kiwei ki jingïalehkai khnang ba yn lah ban sei ïa ki khlur ïalehkai na ka Jylla.
Ha katei ka jingïalang la ïakren halor ki jingpynkhreh ïa ki jaka ïalehkai, ka tarik ban mih na Shillong bad ban poi sha Tura, ki jaka sah ïa ki lai harjar tam ki nongïalehkai kynthei bad shynrang ryngkat ki official, ka jingbiang ki kor internet, ka kam ban kit ia ki tiar ïalehkai sha Tura, ka sngi kut ki jingïalehkai, ka prokram plie bad pynkut, bad kiwei kiwei ki jingdonkam na ki kynhun ha kaba ïadei bad kane ka 5MG2024.
