Nongstoiñ, Naiwieng 22
U Superintendent of Police ka West Khasi Hills District u la pyntip sha ki paidbah baroh ba ka Kong Laidina Rongrin, 27 snem ka rta kaba dei ka khun jong ka Kong Lucy Rongrin, ba shong ba sah ha ka shnong Doronggre bad kaba hikai ha ka Holy Spirit School (Songsak) ka la jah naduh ka 2 tarik u Naiwieng, 2023 katba ka dang leit sha skul bad haduh mynta ym tip shano ka don.
Katkum ka kyrwoh khubor ba la phah da u SP, la pyntip ruh ba ka Kong Laidina Rongrin ka long kaba lieh ka sniehdoh, ka dei na ka jaidbynriew Khasi hynrei ka sngewthuh ruh ïa ka ktien Garo bad Hindi, ka don ïa u shñiuh uba kdor lyngkot bad tah rong ktieh bad ka rynïeng kaba long 5 phut ka jingjrong. Ka la phong ïa ka sopti Salwar kaba rong stem kaba kynthup ïa ka patlun bad ka sopti poh.
Halor kane, u Superintendent of Police ka West Khasi Hills District u la pynmih ïa ka byrta na ka bynta ban wad ïa ka Kong Laidina Rongrin, bad lada don kino- kino kiba ïohi ne kiba ïoh jingtip shaphang jong ka, kin pyntip sha ki thanat kiba hajan eh jong ki. Na ka liang jong u Superintendent of Police, West Khasi Hills District u la dep ruh ban pyntip sha baroh ki thanat jong ka Meghalaya bad ki Jylla kiba marjan na ka bynta ban wad ïa ka Kong Laidina Rongrin.
