Shillong, Naiwieng 22
Ka Khasi Students’ Union (KSU) ha ka Sngi Balang ka la wah ïa ki ‘Poster/Banner’ ha kylleng ka sor Shillong kum ka dak ka jingkynmaw burom ïa ki 5 ngut kiba la kyllon ïap ha ka jingïasiat kaba la jia ha Mukroh, West Jaiñtia Hills, ha ka 22 tarik u Nawieng jong u snem ba la dep.
“Mynta ka sngi ka dei ka sngi ha kaba ka jingjia kaba sngewsih ka la jia ha Mukroh ha kaba 5 ngut ki Khasi kiba la ïeng ban ïada la u pud u sam khlem da don kino-kino ki tiar ïaleh hynrei ki la shah siat ha ki ‘Forest Guard’ bad ki pulit Assam bad duh ei la ka jong ka jingim,” la ong u General Secretary ka KSU, samla Donald V. Thabah haba kren sha ki lad pathai khubor.
U samla Thabah u la pynkynmaw ruh ba ka seng ha u snem ba la dep ka la pynlong ïa ka jingïakhih kum ka jingpyrshah ïa katei ka jingjia bad mynta u snem ka la ïaid shakhmat bad ka ‘Poster/Banner Campaign’ ban kynmaw burom ïa kitei ki 5 ngut kiba la aiti la ka jingim na bynta ka ri bad ka jaidbynriew.
“Kane ka jingleh jong ngi ka long ban pynkynmaw biang ïa ki paradoh-parasnam ba ka jaidbynriew jong ngi ka dang ïai don ha tmier, ha kaba ha kano-kano ka por ngi lah ban shah thombor namar ngi la ïohi kaei kaba jia ha Langpih, Madan Umwang, Block-I, kumjuh ha Mukroh, Lapangap bad kumta ter-ter ban pynsngewthuh ïa ki ba ngim dei ban sngewshngaiñ hynrei ngi dei ban long kiba la khreh ban ïeng na bynta ka ri bad ka jaidbynriew,” u la ong.
Haba kdew ba ka sienjam kaba la shim ha kane ka sngi ka long ruh kum shi bynta ban kyrsiew ïa ki paradoh-parasnam, u General Secretary ha kawei ka liang u la pynpaw ka jinglyngngoh namar don ha katto-katne ki thaiñ jong ka sor Shillong, ka Sorkar ka ïaleh ban weng ïa ki ‘Banner’ kiba la wah da ka seng.
“Kane ka pynlyngngoh ïa ngi ba balei haba ngi wah tang ïa ki ‘Banner’ ruh ki weng bad kim ai lad. Ngi ju ïohi ba kiwei-kiwei ki kynhun ki bym dei na ka jaidbynriew jong ngi ki wah ïa ki ‘Banner’ ha 9-Lad, hynrei ym ju don ba weng bad ngi ïohi da ki bnai ki neh hangto. Hynrei ïa ki jong ngi, mar sien wah, mar sien weng,” u la ong.
Haba pynsngew ba lehse katei ka jingweng jong ka Sorkar ïa ki ‘Banner’ ka lah ban dei na ka jingdon prokram ka tnad Sorkar ha kaba ki heh ki haiñ khamtam na kylleng ka Thaiñ Shatei Lam Mihngi bad India ki wan ban ïashim bynta, u samla Thabah u la ong ba lehse ka Sorkar kam kwah pyni ba ka Jylla ka don hapdeng ka jingshah thombor, jingshah ban beiñ, jingshah pynïap na ka por sha ka por.
“Lane ka lah ban long ba ki don ki heh ki haiñ na Assam ha kaba lada ki ïohi ïa kine ki jingwah jong ngi kan pyntieng ïa ka Sorkar Jylla ïoh ka shah kynhied ha ki heh ka Sorkar Assam,” la ong utei u samla nongïalam.
Shuh shuh u la buh jingkylli ba lada ka Sorkar Jylla kam nud tang ban pyni ïa ka jingwah ‘Banner’ hakhmat ka Sorkar Assam, kata ynda ka la don ha miej ïakren ban pynbeit ïa u pud u sam, “hato ki nud ne em ban ang ka shyntur bad kam ïa ka Mukroh, Lapangap, Khanduli, Langpih bad kumta ter-ter lem bad kiwei-kiwei kiba jaka khappud kiba don hapdeng ka jingïakajia.”
