Shillong, Naiwieng 22
Ka long ka jingsarong ïa ka Jylla hi baroh kawei naba 7 ngut ki nongñiah saikil kiba don hapoh ka synjuk jong ka Meghalaya Cycling Association ki la wanrah burom da kaba khur takma ha ka 6th Edition National Level MTB Tawang Cycling Competition.
Ïa kane ka jingïakop la pynlong da ka Arunachal Cycling Association bad ka Cycling Federation of India kaba la long ha ka 18 bad 19 tarik mynta u bnai.
Kane ka jingïakop ñiah saikil ka long kaba eh bha namar ka la long sha ki bynta ranap lum jong ka Arunachal Pradesh kiba long ha kynjang jong ka sla duriaw, hynrei ki la don bun kiba la wan ïashim bynta na kylleng jong ka ri kynthup na Nepal.
Kane ka long ka sien kaba nyngkong eh ba kiwei ki nongñiah saikil ka Jylla ki la lah ban pynpaw ïa ka jingtbit hadien baka Synjuk ka la pynlong dangshen ïa ka prokram jied (selection trials) bad kumjuh ban ai jinghikai ïa ki nongiashim ïbynta ha Mawkyrwat, kaba ha South West Khasi Hills ha kaba ka la neh haduh katto katne taiew.
Ha ka Women open XCO Mass Start, ka Phyrnai Kyndait ka la khur ïa ka takma ksiar, katba ka Lawankordor Swer ka la khur ïa ka takma rnong. Ha ka Men Junior XCO Mass start, u Lambormi Phawa u la khur ïa ka takma rnong. Ha ka Men Junior XCO relay, u Lambormi Phawa bad u Dalenmi Sana ki la khur ïa ka takma rupa. Ha ka Men Elite -XCO Relay u Kevinjohn Khyllait bad u Alvindarison Wanñiang ki la khur ïa ka takma rnong.
Ki la don lai ngut nongñiah ki la ïoh ïa ki khusnam (consolation). Ha ka Men Elite – XCO Mass Start, u Maxius Wan-ñiang bad u Middlestar N Marak ki la wan ha ka kyrdan basaw bad basan. Ha ka Men Junior – XCO Mass Start u Dalenmi Sana u la wan basaw.
