Shillong, Naiwieng 22
Ka jingïaid lynti ka Rangdajied United FC ha ka Third Division League (I-League 3) ba la pynïaid da ka All India Football Federation ka la poi sha kaba kut hadien ba ka la ïakhaid khlem don ba thep kol pyrshah ïa ka Dempo ha ka sngi Thohdieng ha Goa.
Ha ka jingshisha ka Rangdajied ka donkam ba kan khur ïa ka jingjop pyrshah ïa ka Dempo ha kane ka jingïakhun kaba khatduh jong ka Group-C, katba katei ka kynhun kaba na Goa ka donkam tang ban shu pynïakhaid na ka bynta ban jam sha kawei pat ka wat.
Ha kane ka jingïakhun ka Rangdajied ka la pyrshang ban ïalehkai bha ha ka kylla step bad ki la ïoh ïa ki katto katne ki kabu kiba biang, hynrei kim shym la lah ban thep na ka daw ka jingtbit u rangapkol ka Dempo.
Lyngba kane ka jingïakhaid, ka Dempo ka la jam sha kawei pat ka wat hadien ba la ïoh ban lamkhmat na kane ka group ha kaba ka la kamai 10 point na ki saw sien ïakhun, katba ka Rangdajied (8 point) kaba la wan ba-ar, balai ka Kickstart FC (7 point), basaw ka JIT FC (3 point) bad ïa ka kyrdan ba khatduh la bat da ka Millat FC (0 point).
