Shillong, Naiwieng 22
Ka shi kol ba la thep da u Phrangki Buam ka la biang pura ïa ka Shillong Lajong FC ba kan khur ïa ka jingjop kaba ar ha la ïing. Kane ka wan urlong hadien ba pynliem ïa ka Delhi FC da 2-1 kol ha ka sngi Balang ha SSA Stadium, Polo.
Utei u rangïalehkai shapdeng u la lah ban thep ïa katei ka kol hashwa ban wai ka por hadien ba ïakhaid mar shi kol.
Kane ka jingjop kaba ar ka la pynlong ruh ïa ka Lajong hapoh ka jingïalam u Bah Bobby L. Nongbet ban kiew lai kyrdan kata sha ka kyrdan ba saw.
Ha kane ka jingïakhun jong ka lympung ïalehkai I-League, baroh ar kynhun ki la pyrshang ban ïakhun tyngeh naduh kaba sdang. Ka Lajong ka la ïoh ban pynkhih jar nyngkong eh lyngba u rangïalehkai shakhmat na Senegal u El Hadji Abdou Karim Samb ha ka minit kaba 23. Kane ka shi kol ka la ïai neh haduh kaba kut jong ka kylla step.
Hadien katto katne por ba la bteng ïa ka jingïakhun jong ka kylla miet, ka Delhi ka la ïoh ban pynphai kylla lyngba u Gaurav Rawat ha ka minit kaba 60 na ka bynta ban ïakhaid mar shi kol.
Kane ka jingïakhaid ka la pynlong ïa kine ki kynhun ban ïai bteng ha ka ban ïakhun tyngeh na ka bynta ban ïoh thep kol biang. Hashwa ban wai u Phrangki u la ïoh ban thep kol ha ka minit kaba 82 na ka bynta ban pynlong ïa ka Lajong ban khur ïa ka jingjop.
Lyngba kane ka jingjop, ka Lajong kaba la don ha ka kyrdan basaw ka la kamai 9 point na ki san sien ïakhun, katba ka Delhi ka la hiar sha ka kyrdan ba hynriew bad 7 point.
Ka Lajong kan pyn-khreh biang ïa ka jingïa -khun ha la ïing ha ka 25 tarik mynta u bnai pyrshah ïa ka TRAU.
