Jerusalem, Naiwieng:
Ka Israel bad Hamas ha ka Sngi Balang ki la pynbna ia ka jing iamynjur ban pyllait noh ia 50 ngut kiba la shah rahbor ha ka Hamas naduh ka 7 tarik u Risaw jong ka jingsdang leit hiar thma ki lehnoh Hamas sha Israel. Hynrei ka Hamas ka la kular ban pyllait ia kitei kiba ka la dep rahbor tang 50 ngut shuwa lada ka Israel ruh ka kular ban sangeh ia ka thma kumba 4 sngi lynter. Kumta la ong ba ha kitei ki 4 sngi ba ka Israel kan sangeh ia ka jingleit hiar thma sha Gaza, ka Hamas pat kan nang pyllait khyndiat- khyndiat ia kitei ki 50 ngut kiba ka la dep rahbor kiba kynthup ruh ia ki kynthei bad ki khyllung- khynnah.
La ong ba hadien kumba katto katne taiew ba la Qatar ka la pynkheiñ ia ka jingiakut, u Myntri Rangbahduh ka Israel- u Benjamin Netanyahu bad ki Myntri ka sorkar jong u ha ka Sngi Balang ki la iashong pyrkhat ban shim rai halor katei ka jingiakut, ha kaba ki la mynjur ban sangeh ia ka thma na bynta 4 sngi ba ka Hamas kan pyllait ia kitei ki 50 ngut ki briew kiba ka la dep rahbor na Israel naduh ba sdang jong ka thma.
Kumjuh ruh haba iadei bad katei ka jingiakren ‘Humanitarian Truce’, na ka liang ka Hamas ruh ka la pdiang sngewbha ia katei ka rai jong ka Israel bad ka la pynpaw ruh ba ka thrang ban iohi ia ka Israel ba kan pyllait noh ia 150 ngut ki nong Palestine kiba la shah kem bad shah bat ha ka Israel naduh ki por ba la leit.
Kumba la iohi ba ki lehnoh Hamas ki la sdang ban leit hiar thma ia ka Israel dei ha ka 7 tarik jong u Risaw ba la leit. Ha katei ka por, ka Hamas ka la ther dusmon da ki spah tylli ki bom bad ki ‘namding sha Israel bad ki lehnoh Hamas ki la leit ruh wat ban rung ha man ki thliew iing jong ki paid nongshong shnong ha khappud jong ka Israel bad ki la leit ban pyniap bad khrai khlieh naphang naduh ki khyllung haduh ki kmie ki kpa.
Dei naduh katei ka sngi ba ka Israel ruh ka la bitar bad smai ba kan pynhiar kput naka bynta ki paidbah nongshong shnong jongka kiba la shah thombor ha katei ka kynhun lehnoh Hamas namar ym tang ka jingpyniap hynrei ki lehnoh Hamas ki la rahbor ruh ia kumba 240 ngut ki briew na Israel kynthup ia ki nongwei kiba dei na kiwei ruh ki ri hynrei kiba shu leit shong shipor ha Israel.
Kumta, la ong ba wat haba ki tnat bapher bad ki ri bapher jong ka pyrthei ki la kyntu ia ka Israel ban sangeh noh ia kane ka thma, hynrei ka Israel da ka jingbitar, kam shym la pynsngap ia kitei ki jingkyntu bad kumba ka la kular naduh kaba sdang, ka la smai ba kan iakhun tyngeh bad kan kput ia ki lehnoh Hamas haduh kaba kut bad haduh ba kan da ioh ia ka jingjop namar lada kan sangeh noh ia ka thma, kitei ki lehnoh ki lah ban ioh bor bad kin sa khie khlieh biang hadien- habud bad ka ban long ruh ka jingma kaba khraw ia ka Israel bad ia ki ri ba marjan jongka. Dei na kane ka daw ba ka Israel ka la smai ba kan kput bad kan pynduh jait syndon ia katei ka kynhun lehnoh Hamas bad ba kan ioh synshar hi noh syndon hapoh Gaza Strip baroh kawei.
