Shillong, Naiwieng 22
Khyndai ngut ki ‘rang ïakura ki ban ïashim bynta ha ka 7th Elite Men’s National Boxing Championship ka ban sdang naduh ka sngi Saitjaiñ, la pynbna ka Meghalaya Boxing Association (MBA).
Ïa kane ka rynsan ïakura ka ban long ha SAI Indoor Stadium kaba ha NEHU naduh ka 25 tarik u Naiwieng haduh 1 tarik u Nohprah, yn wan ïashim bynta palat 350 ki ‘rang ïakura ha ki 13 tylli ki kyrdan ïakura bapher bapher bad yn pynlong ïa ka da ka MBA bad ka Boxing Federation of India (BFI) ha kaba yn bei tyngka da ka tnat ïalehkai ka Sorkar Jylla.
Ki rangïakura ka Jylla ki long u Sanjeev Maskut (46-48kg), Banjop Nongkhlaw (51-54kg), Melvin Marbaniang (54-57kg), Kordor Marweiñ (57-60kg), Badonkupar Synnah (60-63.5kg), Bhalang Shadap (63.5-67kg), Balnas Sangma (67-71kg) bad u Justerwell Jyrwa (71-75kg). Katba ki coach ka Meghalaya ki long u Pynskhem L. Nonglait, Wilfred Kharmawlong bad u Noyontho Marak.
Kitei ‘rang ïakura ki dei kiba ju ïashim bynta ha ki rynsan ïakura bapher bapher ha kaba ki la ju khur jingjop ha ka Jylla bad wat shabar ruh kumjuh. Te mynta kine kin pynkhreh ban ïatynjuh bor bad kiwei pat ki ‘rang ïakura na kylleng jong ka ri, ha kaba kiba bun na ki, ki dei kiba la khur takma ha ka National Games, Asian Games bad ruh ha ka Commonwealth Games.
Katto katne na ki khlur ïakura ki ban ïashim bynta ki kynthup ia u Shiva Thapa uba la ïalehkai ar sien ha ka Olympic bad uba la khur takma hynriew sien ha ka Asian Championship, kumjuh u Amit Panghal uba la khur nam lahduh ha ka Asian Games 2018 bad u rangïakura uba la khur takma rnong ha ka Commonwealth Games 2022 u Rohit Tokas nalor kiwei pat.
Kumba ka paw ka BFI ka la pynkhreh ban pynlong ïa ka prokram ai jinghikai ha u snem ban wan na ka bynta ban pynkhreh ïa ka Paris Olympics 2024, te kumta kane ka lympung ka long kaba kongsan na ka bynta ki nongïakura. Na ka liang ka MBA bad ka tnat Sports and Youth Affairs kin ïaleh katba lah ban pynurlong ïa kane ka lympung kaba jop.
