Shillong, Naiwieng 22
Ka Argentina ka la lah ban khur ïa ka jingjop ha ka jingïaknieh rung World Cup 2026 (qualifying) hadien ba la lah ban pynliem noh ïa ka Brazil da 1-0 kol ha ka step jong ka sngi Balang ha Maracana Stadium kaba ha Rio de Janeiro, Brazil.
Kane ka nam jop ka la wan urlong lyngba u ‘rang ïalehkai ‘dien u Nicolas Otamendi uba la lah ban thep ha ka minit kaba 63 na ka bynta ban pynlong ïa katei ka lahduh jong ka World Cup 2022 ban ïai bat ïa ka kyrdan ba hakhlieh jong kane ka lympung ïaknieh na South America ha kaba ka la kamai 15 point na ki hynriew sien ïakhun.
Kane ka jingjop ka la long ruh shi bynta ban khylli noh na ka jingshah rem ha ka Uruguay ha ka taiew ba la lah. Ha kawei pat kal liang ka Brazil ka la mad ïa ka jingshah rem kaba lai ha kane ka lympung ïaknieh, ha kaba kane ka kynhun kaba la rah teng ïa ka nam lahduh haduh san sien ha ka World Cup ban shah tam haduh hynñiew point bad ban don ha ka kyrdan ba hynriew na ki hynriew sien ïakhun bad kamai 7 point.
Hashwa ban sdang ka jingïalehkai, ka la mih ki kynrum kynram ha Mara -cana, ha kaba ka la pynlong ïa ki pulit ka Brazil ban pyndonkam da ki lathi ban khanglad ïa ki nongkyrshan ka Argentina. Kiba bun na ki rangïalehkai ka Argentina ki la ïaleh ban pynjai jai ïa ki paidbah bad u wat u rangapkol u Emi Martinez u la pyrshang ban kynthih sha ki jaka shong ba don ki paidbah ban ïakhun pyrshah ïa ki pulit kiba la biang bha ki jingïada ïalade.
Da kane ka jingïapyni bor ka la pynlong ïa ki rangïalehkai ka Argentina ba la lamkhmat da u Lionel Messi, ba kin shim ïa ka rai ban mih noh na madan. Na ka liang u Messi u la pynpaw, “Ngin ym ïalehkai shuh, ngin mih noh na kane ka jaka.”
Na ka daw kine ki kynrum kynram, kane ka jingïalehkai ka la shimpor haduh 30 minit ban sdang ïa ka, hynrei baroh ar tylli ki kynhun ki la don ha madan bad hadien ba la lah ban sdang ïa ka.
Wat hapdeng kitei ki kynrum kynram, ki rangïalehkai ki la lah ban pyni ïa ka mynsiem ïalehkai bad ha kaba kut ka Argentina ka la lah ban khur ïa ka jingjop.
